Atu hasa’e kualidade edukasaun iha Timor-leste ho diak, governu presiza kria kondisaun moris ne’ebe diak ba profesores sira, liu-liu sira ne’ebe hanorin iha eskola publiku.
“Tuir hau nia hare no observa katak governu ita nia governu presiza tau matan ba salariu pofesores sira nian, nune’e sira iha vontade diak atu hanorin estudante sira ho kualidade,”hateten Asesor Lian iha Ministeriu Edukasaun, Agostinho Caet, semana kotuk (08/09) iha Vila-verde,Dili.
Nia parte hato’o kestaun ne’e relasiona ho eskola privadu ne’ebe iha kualidade edukasaun diak liu kompara ho eskola publiku.
Alende salariu, tuir Caet profesores sira ne’ebe agora hanorin iha eskola sira ne’e maioria tanba hatene Portugues maibe la bazea ba background edukasaun ba profesores. “tanba ne’e dalaruma halo impedementu ba kualidade edukasaun iha eskola publiku,”nia dehan.
Enkuantu iha eskola privadu,profesores neebe hanorin iha ne’eba tenke tuir standar ne’ebe iha “katak profesores sira hanorin tuir sira nia bidang, la’os tanba hatene deit Portugues nia bele hanorin, la’e, tanba ne’e sira iha liu kualidade,” Caet afirma.
Tuir membru Komisaun F Parlamentar, Deputadu Francisco de Araujo katak atu garante kualidade estudante sira nia eskola, profesores iha dever atu hanorin alunus sira tuir sira nia konsiensia rasik.
“Hau hanoin salariu la afeta ba ema nia prezente diak ka ladiak, maibe depende ba jestaun ministeriu nian atu hare nia element sira iha baze, maibe kuandu profesores sira iha konsiensia, sensiativa no korajen atu hanorin, hau hanoin ensino bele iha kualidade maibe kuandu buat sira laiha mak susar tebes,”nia dehan.
Kona-ba eskola misaun nian mak iha liu kualidade, tuir Deputadu ne’e katak tanba profesores sira kumpri sira nia dever, sira iha disiplina no tama tuir orariu ne’ebe eskola determina ona.
“Maibe eskola publiku, profesores sira atu hanorin sira dehan ida ne’e, ida ne’eba, entaun ne’e labele,ne’e presiza hadia,”nia kritika.
Tanba ne’e husu ba profesores hotu atu servisu tuir level ne’ebe iha no simu salariu mos tuir level ne’ebe iha, maibe kontinuasaun atu hanorin ema tenke iha “selae ita hamate future alunus sira nian,”nia katak.
