Tuir Asesor Lian iha Ministeriu Edukasaun (ME) Agostinho Caet katak lian Portugues ne’ebe durante ne’e hanorin iha eskola,ladun transfere ho diak tanba alunus barak mak lahatene lian ne’e.
“Hau hanoin hanorin ho lian Portugues iha eskola ne’e diak maibe alunus sira ladun partisipa ho diak tanba lian ne’ebe profesores sira hanorin ne’e alunus sira lahatene no la kumpriende entaun matenek ne’e ladun transfere ho diak, ladun efetivu entre alunus ho profesores,” hateten Agostinho Caet semana kotuk (08/09) iha nia knar fatin Vila-verde,Dili.
Tuir nia, ohin loron mundu modern, presiza jerasaun ne’ebe kritiku tanba ne’e bainhira iha prosesu aprendizajen alunus sira ladun partisipa oinsa mak bele garantia kualidade edukasaun ne’ebe diak.
“Maske alunus sira iha buat barak mak atu hato’o maibe tanba lahatene lian Portugues entaun nia nonok deit ona,ne’e ladun diak,”nia katak.
Tanba ne’e husu profesores sira atu labele obriga labarik sira ho lian Portugues maibe tenke tuir faze pur faze,nune’e sira bele ativu liu tan iha prosesu aprendizajen.
Iha parte seluk membru Komisaun F Parlamentar Deputadu Francisco de Araujo rekonese katak lian Portugues defisil duni tanba ne’e komisaun husu ba ME labele loke deit formasaun iha nivel nasional, rejional maibe tenke tama to’o iha aldeias no sukus.
“Nune’e ita nia profesores no estudante sira iha baze bele kumpriende lalais tanba lian Portugues ne’e sensitive tebes atu kumpriende tanba iha verbus barak,”nia dehan.
Entretantu tuir estudante eskola Sekundaria 10 Dezembru, Alipio Lopes katak hanorin ho lian Portugues diak maibe sira ladun akapta ho diak tanba difisil liu.
“nia verbu mak barak liu, entaun ami labele simu material ho diak tanba ami lahatene no la kumpriende, mas ema mak koalia ita rona kapas tiha,”nia dehan.
