“Tanba sa mak ami tenke denunsia inkapsidade Governu ida ne’e ninian, tanba hau fo ezemplu tekniku deit tanba sa mak jeradores sira ne’e hatene tiha ona ninia pezu ne’e 250 toneladas ba kada jerador sira hanoin oinsa mak tau fali iha portu temporariu iha Behau ne’eba,” kritika Deputadu Inacio Moreira iha konferensia da emprensa ho jornalista sira iha sala bankada Fretilin, semana kotuk (07/09) iha PN.
Tuir nia, jerador ne’e monu tanba Governu mak la iha planu ne’ebe diak atu hare fatin ne’ebe mak seguru.
“Konsekuensia seluk mak hau hakarak hateten lolos tenke kumpri promesa ne’ebe mak sira promete tiha ona, “ Moreira dehan.
Orsamentu ba jerador 15 ne’ebe mak ho kapasidade 250 mega watt tuir aprovasaun orsamentu iha Parlamentu Nasional hamutuk trezentus seis senta e dois miloens (362 milioens).
Iha fatin hanesan membru bankada Fretilin Joaquin Amaral husu atu halo investigasaun ne’ebe profundu kona-ba asidente ne’e.
“Ho asidenti ne’e lori imajen Timor-leste nian ba mundu internasional ladiak tanba investidor ne’e ema internasional, “ Amaral dehan.
Ho akontesementu ne’e, nia parte duvida ho deklarasaun husi partidu balun ne’ebe dehan iha 28 Novembru tinan ne’e ahi se lakan normal.
Nia dehan persija duni halo investigasaun atu nune’e publiku bele hatene konaba garantia iha 28 novembru Ahi bele lakan ga lae .
“Lori tempu hira mak transpotasaun ba jerador ne’e hodi to’o iha sentral tuir kalendariu ne’ebe trasa tiha ona iha kompania atu nune’e povu bele hetan ahi tuir promesa Governu nian,” nia kestiona.
Entretantu tuir Xefe Bankada Fretilin Aniceto Guteres katak, Governu tenke responsabiliza ba jerador ne’ebe monu ne’e.
“Ami bele dehan katak asidenti ida ne’e , konforme relatoriu ne’ebe ami hatene katak kompania El Konsultan ninian ba projetu ida ne’e hateten tiha ona katak, kondisoens estradas husi portu Behau ba sentral eletrika mak kondisoens estrada la diak,”nia dehan.
Tuir nia, molok hasae jerador ne’e ba iha kontainer leten, kareta mak la iha kapasidade atu lori jerador ne’e to’o iha fatin.
“Tanba ne’e mak to’o deit iha subida oituan deit nia patina kedas iha ne’eba depois fiu kotu baku fila tiha iha ne’eba,” nia katak.
