Universidade Nasional Timor-Lorosa’e (UNTL) desidi katak liu hosi ambiente iha kampus hotu universitariu mos importante ba aprendizajem estudantes no mos ba staff dosente no seluk tan iha insitutisaun nasional ne’e no mos diak atu hatudu ba instiutisoens seluk kona ba importansia mantein ambiente mos.
Oras ne’e UNTL estabelese ona ekipa limpeza atu proteje ambiente iha universidade nasional ne’e.
Vise Dekano I husi Fakuldade Edukasaun Artes e Humanidade, UNTL, Pedro Soares, hateten katak ambiente iha nia fakuldade oras ne’e dadaun saudavel teb-tebes hahu husi jardim, koredores, parede, no salas de aula.
“Hau husu ba estudante no dosente sira atu bele mantein nafatin ho ambiente ne’ebe mos hosi nune’e bele garante prosesu aprendizajen ho di’ak ba estudante sira,” hateten Vise Dekano I Soares, foin dadauk, iha Kampus UNTL iha Dili.
Alende ne’e nia haktuir tan katak atu proteje ambiente iha universidade nia kampus hotu ne’e labele depende de’it ba kompañia limpeza maibe prezija mos apoio husi estrutura tomak kompostu iha fakuldade ne’e, nia fo ezemplu uza markador ne’e la permanente hodi nune’e bele hamoos kuadru ho fasil. Nis mos fo sujestaun ba ekipa limpeza atu hamoos haris fatin sira ho di’ak atu nune’e labele fó impaktu ba estudante sira.
Estudante hosi Departamento Kimika, Simão Martins, hateten nia parte senti kontente tebes ho prezensa ekipa limpeza sira nian iha fakuldade ne’e, tanba sira bele estuda no sente ambiente mos kompara ho tempu uluk ne’ebe aula laran nakonu ho rai rahun no jardim sira nakonu ho foer.
Estudante Martins halo apelu ida ba nia maluk estudantes seluk atu labele labele so’e foer arbiru hodi nune’e bele mantein ambiente ne’ebe mos iha universidade UNTL.
Iha parte seluk staff limpeza Natalino Soares hateten sira halo limpeza hahu hosi jardin to’o sala de aula no haris fatin.
Ekipa limpeza mai hosi kompñia Manu Fuik ne’ebe manan tender hodi halao limpeza iha kampus universidade nasional UNTL.
