“Hau iha lista ida ne’ebe sira haruka mai, bainhira ami ba halo verifikasaun dadus veteranus sira nian iha Oe-Cusse, iha grupu ida hetan to’o 3 mil e tal e komunidade balu fa’an tiha sira nia karau, fahi no animal sira seluk hodi fo ba sira,”informa Deputadu Agustu Tara, semana kotuk (06/09) iha Parlamentu.
Tuir nia, estadu presiza tau matan ba kestaun ne’e tanba komunidade sira iha ne’eba iha situasaun ida ne’ebe miseravel tebes.
“Hau rasik ba iha Pasabe no Nitibe,populasaun sira iha ne’eba mesak hela deit iha uma tali maibe grupu ida ne’e halo tan kobransa ba sira, hau lahatene sira atu halo saidaosan ne’e,”nia preokupa.
“Tanba ne’e mak hau halo nota ida ne’e atu bele enkamina ba iha Governu atu hare ba situasaun hanesan ne’e,tanba situasaun ne’e kontinua la’o nafatin iha ne’eba to’o agora,”.
Entretantu hatan ba kestaun ne’e, Kordenador Jeral grupu CPD-RDTL, Antonio Ai tahan Matak rezeita informasaun ida ne’e no informasaun ne’e falsu.
“Ami kontra deklarasaun husi Deputadu Agustu Tara ne’ebe fo sai iha radio iha 05 Setembru katak ami nia membru halo kobransa illegal iha Oe-Cusse, ne’e informasaun falsu,”nia rezeita.
Tuir nia, deklarasaun ida ne’e hanesan halo defamasaun ba nia tanba la justu no la los. “ne’e bosok ten, lohi ten e bobar ten tanba nia hamutuk ho Joni Taibesi mak halo defamasaun ida ne’e,” trata Aitahan Matak.
Nia hatutan, akuzasaun ida ne’e hanesan kondena ida ne’ebe maka’as hodi la rekonese funu nain sira durante tinan 24 nia laran e lori fali argumentu akuzasaun falsu.
“Dehan fali hau Antonio Aitahan Matak simu osan husi Tarciso da Costa, ne’e lalos no falsu e hau prontu atu hatan iha tribunal iha justisa popular, justisa internasional ba akuzasaun ida ne’e, “ nia koalia ho seriu.
