Tuir Diretora Diak Printing Business, Deolinda Cunha, katak atu manan autor violensia domestika sira nia konsiensia, presiza hakbesik ba sira hodi fo konsellu ba sira nune’e sir abele kumpriende.
“Tenke kalma,koalia mamar ba sira, konta istoria ho sira (fen-la’en), toba hamutuk ho sira, nune’e it abele manan sira nia komprensaun, sela’e difisil,”hateten Deolinda Cunha semana kotuk iha nia knar fatin Lad Mark, Fatu-hada,Dili.
Cunha hato’o kestaun ne’e relasiona ho kazu violensia domestika ne’ebe kontinua mosu maske governu liu husi Sekretaria Estadu Promosaun e Igualidade (SEPI) kria ona Lei Violensia Domestika (VD) no aprova iha Parlamentu Nasional.
Eis Staf Konselling ba vitima VD ne’e hatutan, komprensaun komunidade sira ne’ebe hela iha area remotas kona-ba lei VD sei minimu, tanba ne’e presiza hakbesik sira ho meius seluk ne’ebe halo sir abele kumpriende.
“Dalaruma ita ba koalia ho sira kona-ba asuntu ne’e, sira dehan ita nia kustume mak nune’e duni ona katak feto tenke servi nia la’en no hare uma laran, hare labarik, entaun ne’e la fasil ba ita atu muda ema ida nia konsiensia,presiza pasiensia barak,”nia haktuir.
Tuir nia, implementasaun Lei VD seidauk maximu tanba komunidade barak liu-liu sira ne’ebe iha area rural, tanba alende kustume mos tanba linguajen. “Sira iha rea rural barak mak lahatene lian Tetun, sa’tan lian Portugues, tanba sira koalia liu sira nia lingua rasik, entaun ida ne’e mos difikulta sira atu kumpriende kontiudu lei ne’e, e ita presiza duru basa ida nune’e bele tradus ba sira,”nia sujere.
Entretantu iha parte seluk Cesilia Soares hanesan dona da casa hateten kazu VD kontinua aas tanba sosializasaun ne’ebe hala’o husi governu liu husi SEPI la proporsional. “Sira foin halo sosializasaun iha distritu balun deit e distritu barak mak seidauk tama, entaun oinsa make ma bele hatene no kumpriende katak violensia ne’e krimi,”nia preokupa.
Tanba ne’e tuir nia, governu tenke halo sosializasaun iha fatin hotu inklui iha sub-distritu no diak liu tan tama to’o iha sukus no aldeias.
“Durante ne’e ita hare lei violensia ne’e ba deit ema sira ne’ebe hela iha capital, liu-liu ba sira ne’ebe iha nivel edukasaun aas,”nia observa.
