“Ro ne’ebe lori jerador ne’e ida tranka ona lori jerador 3 horseik tuku 3 lorokraik no ida seluk ne’ebe lori jerador 4 oras ne’e iha hela tasi Java nian iha Semarang nia sorin, “informa Sekretariu Estadu Eletrisidade Agua e Urbanizasaun (SEEAU) Januario Perreira, semana kotuk iha nia knar fatin Kaikoli, Dili.
Tuir nia, maske uluk dehan jerador 3 mak mai uluk maibe agora jerador 7 ne’e maid ala ida e jerador hitu ne’e sei lori ba iha portu provizoriu Behau.
“Jerador hitu ne’e hatun hotu tiha iha Behau mak foin bele lori mai iha Sentral Eletrika Hera hodi monta, karik han tempu durante 12 oras kada jerador ida tanba tula ho trailer naruk,”nia dehan.
Maibe antes jerador hirak lori mai iha Hera husi Behau, hahu 19 Agustu to’o 15 Setembru prepara uluk dalan iha parte ne’eba.
“Tanba ne’e husu ba maluk sira ne’ebe mak uza dalan ne’e pasensia oituan tanba jerador sei atraveza dalan ne’eba nian iha loron ne’ebe ami determina ona, “ Januario dehan.
Entertantu tuir Prezidenti Komisaun G Parlamentar, Pedro da Costa katak, konstrusaun ba fatin jerador sira ne’e atinji ona pursentu 75 (75%).
“Rede transmisaun liu ona pursentu 50 iha parte norte nian, tore sira ne’ebe monta iha parte ne’e, husi Hera ba Manatuto no Baucau,”nia hateten.
Alende ne’e Deputadu Aderito Hugo hateten, konaba jerador ne’ebe mak atu to’o mai ,iha semana kotuk Governu liu husi Primeru Ministru halo ona espesaun ba kondisaun estradas no pontes .
“Tan ne’e mak loron ruanulu resin lima ne’e estrada asesu transportes ba iha ne’eba sei limita oituan, “ deputadu Aderito dehan.
Tuir deputadu ne’e katak, lina transmisaun ba fiu sira nebe mak dada to’o tiha ona iha Manatutu.
“Estasaun–estasaun iha distritu hanesan Liquisa,iha Dili, Manatutu, Baucau, Lospalos monta hotu ona no fondasi para atu tau jerador 7 ne’e mos preparadu hotu tiha ona” Aderito informa.
