“Prosesu fos to’o iha capital kleur tanba birokrasia organizasaun mak ladiak,”hateten Rozito Quintao, staf UNAPE, semana kotuk iha Comoro,Dili.
Rozito ne’ebe alende staf UNAPE mos hanesan negosiante fos UNAPE, hateten nia parte fa’an ho presu $15,00 kada saka tanba sira sosa kada saka $14.50 cents.
“Ami fa’an fali $15,00, nune’e bele hetan netik nia funan mai ami,”Rozito informa.
Tuir nia, lolos sira lakon tanba sira sosa fulan ida dala ida e sira sosa deit 86 sakas ho folin $986,00 no selu taxa tinan ida $60,00, fulan ida $5,00.
“ Hau lakoi ona fa’an fos tanba ami ba hatama osan iha kapital ne’eba maibe to fulan tolu mak fos ne’e to’o iha ami nia liman tanba fos sira ne’e mai husi Vietnam no ami nia osan restu to’o agora sira la fo e to’o agora edifisiu UNAPE sei taka hela,”nia dehan.
Iha parte seluk tuir konsumidores Elio Andre iha komoro katak,fos UNAPE iha kualidade diak soke folin mak aas.
“Ami povu ki’ik hola labele tanba folin fos ne’ebe iha ne’e saka ida 15 ou 16 dolar kedas,” nia preokupa.
Entretantu tuir Diretora Interinu Camara Comersiu Industria (CCI),Nina Belo, katak CCI hanesan sumbrina ida ba asosiasaun industria iha Timor-leste inklui UNAPE, karik asosiasaun ruma iha problema sira tenke simu keixa.
“To’o agora ami seidauk simu informasaun formal ou karta no verbal mai iha ne’e konaba prolema iha UNAPE nian,”haktuir Nina Belo.
