“Ami sei toma desizaun hodi ba vizita fatin rua ne’e,hare to’ok item sira ne’e implementasaun diak ka la’e no kualidade ga la’e,” hateten Prezidenti Komisaun H, Antonio Cardoso semana kotuk iha Parlamentu.
Tuir Cardoso, rehabilitasaun bele la’o maibe tenke iha kualidade , nune’e labele repete hasai orsamentu ba projetu ida hanesan akontese Pakote Referendu, Programa Desentralizasaun do Dezenvolvementu (PDD) 1 PDD 2.
“Tenke hatudu ninia kualidade atu nune’e osan ne’ebe gasta ne’e ema bele uza stadio no GMT ne’e sai hanesan sentru publiku ida e ema hotu bele uza,”Cardoso dehan.
Entretantu tuir Eti Sukarno ne’ebe mak halo servisu rehabilitasaun ba Stadio Municipal katak, projetu ne’e hala’o durante fulan rua ona no sei remata iha tinan ne’e.
“Ami hahu projetu ne’e iha fulan Maiu no sei remata iha 15 Dezembru tinan ne’e, tanba aumenta tan uma sor-sorin inklui rehabilita total kampu laran,” nia katak.
Iha fatin hanesan Suriati mos hanesan traballador iha fatin ne’eba,hateten nia parte labele determina bainhira mak remata projetu ne’e.
“Ba hau ,hau la bele dehan bainhira mak hotu maibe depende ba servisu ne’e la’o ,hotu tiha mak hau foin bele dehan hotu ona,” Suriati afirma.
Projetu rehabilitasaun ne’e rasik toma konta husi Kompania Montana Diak.
