Hafoin halo adiamentu ba Lei Reparasaun ba Vitima 1974-1999 iha tinan kotuk, iha semana kotuk Prezidente Parlamentu Nasional (PN) anunsia ba deputadu hotu katak atu reajenda hikas lei ne’e hodi halo debate iha plenaria.
“Prezidente Parlamentu rasik mak anunsia ba bankada hotu-hotu iha Tersa semana kotuk, katak reajenda fila-fali lei reparasaun ne’e nune’e bele halo debate iha plenaria parlamentu,” hateten Deputadu Aderito Hugo, semana kotuk iha PN.
Tuir nia, lei ne’e rasik debate ona iha parlamentu iha tinan kotuk maibe lakonsege aprova tanba deputadu lubuk ida halo proposta hodi halo adiamentu.
Entretantu Deputadu bankada PUN Domingos Mesquita hateten, lei ne’e importante tebes hodi hare ba vitima sira ne’ebe sofre durante 1974-1999.
“Ita hein katak lei memoria ne’e sei tau fila-fali iha ajenda iha fulan Novembru nune’e debate fali,”Domingos esperansa.
Alende ne’e tuir Deputadu Pedro da Costa, katak lei reparasaun ne’e pending iha tinan kotuk tanba problema veteranus sira nian ne’ebe seidauk hotu.
Tuir nia, alende lei reparasaun, lei seluk ne’ebe sei diskute iha tempu badak mak hanesan lei fundu petroliferu, proposta de lei dividas, lei kodigu sivil no lei brankeamentu kapitais.
“Lei ne’ebe prioridade liu no atu aprova iha tempu badak mak kodigu sivil,” nia dehan.
