Atu asegura estabilidade durante eleisaun jeral 2012 la’o ho diak, Partidu Politikus hotu ne’ebe agora mosu bar-barak, presiza kria plata forma unidade nasional ida ne’ebe kompletu ho asina husi lideransa partidus hotu.
“Liu husi asina plata forma ne’e hatudu sira nia komprimisiu ba interese nasional no estabilidade iha rai laran, liu-liu durante eleisaun jeral ne’ebe sei hala’o 2012,” hateten Jose Caetano Guterres, Program Manajer Search For Common Ground (SFCG), semana kotuk hafoin halo vizita ba Parlamentu Nasional relasiona ho komemorasaun loron mundial joventude, iha PN.
Tuir nia, presiza duni kria plata forma ne’e, tanba Timor-leste (TL) uza sistema multi partidaria e ohin loron partidus foun barak mak mosu e oinsa mak bele garantia estabiliddae iha rai laran.
Entretantu tuir Deputadu Aráo Nóe husi bankada Congresu Nasional Rekonstrusaun Timor (CNRT) katak, plata forma halo bar-barak ona maibe ema la iha konsiensia atu kontribui ba estabilidade ne’e rasik.
“Hau hanoin kria estabilidade iha eleisaun jeral ne’e konsiensia militantes partidu ida-idak nian katak eleisaun jeral halo festa popular ema hotu tenki kumpriende,” nia dehan.
Tuir nia, atu asegura estabilidade durante eleisaun jeral, laos deit responsavel husi polisia no forsa nasional nian maibe presiza kontribuisaun husi ema hotu.
“Liu-liu partidus politikus sira ne’ebe mak compete iha eleisaun ne’e tenke hateten diak liu eleisaun jeral ne’e povu mak desidi,” Deputadu ne’e katak.
