Governo liu husi Ministeriu Turismu Comerciu e Industria (MTCI) iha ona planu atu estabelese fatin turismu comunitaria iha distritu 13, atu nune’e comunidade bele pasa ferias iha fin de semana no bele senti saida mak dezenvolvimentu.
“Sim ita iha planu atu kria fatin turismu comunitaria iha treze distritu maibe tenke bazea ba proposta ne’ebe comunidade hatama,” hateten Diretor Nasional Turismu, Jose Diaz Quintas, semana kotuk iha Mandariin, Dili.
Tuir nia, oras ne’e dadaun tama ona faze halo survey kona-ba area ne’ebe mak prioridade liu atu harii uluk fatin turismu komunitaria ba komunidade sira maibe faze pur faze.
Nia hatutan, atu kria programa ruma la fasil atu implementa lalais maibe presiza tempu tanba ne’e “ita tenke servisu maka’as halo mekanismu oinsa para bele realize planu ida ne’e no bele susesu,” Quintas dehan.
“Fatin turismu komunitaria ne’e alende komunidade sira mos ba turista sira atu halo paseu.”
Nia informa, oras ne’e dadaun iha ona proposta balun tama ona iha DNT husi distritu Lautem no disritu balun maibe nia parte seidauk identifika lolos atu harii uluk iha ne’ebe.
“Iha ne’e ami sei harii hotel, bar no hala’o atividade seluk ne’ebe iha relasaun ho turismu nian nune’e bele atria turista sira,”nia dehan.
Iha sorin seluk Arzonio dos Santos, comunidade Distritu Manatuto, husu ba govenru antes atu loke fatin turismu ne’e, presiza halo koperasaun ho komunidade sira nune’e sira mos bele fo kontribuisaun ba planu ne’e.
“Tanba ita hatene katak bainhira realize planu ne’e klaru katak sei loke bar, hotel, guest house no seluk tan e hau espera katak maske agora sei planu deit maibe sei realize duni,”nia esperansa.
Nia mos sujere ba governu, karik planu ne’e realize, diak liu loke uluk iha distritu Lautem, liu-liu iha Tutuala, tanba fatin ne’eba iha paijazen no tasi ibun ne’ebe furak no kapas no bele atria turista iha rai laran no turista internasional.
