Relasiona ho eleisaun jeral ne’ebe sei hala’o iha tinan oin, partidu politikus barak komesa halo konsolidasaun no forma estrutura hanesan mos partidu ASDT ne’ebe fo pose ba nia membru sira iha esturura foun nune’e bele prepara aan ba eleisaun prezidensial no lejislasaun.
“Ita hotu hatene katak iha isu barak mak namkari iha fatin hotu-hotu kontra ASDT, ne’e duni atu hametin ASDT ita sei fó pose ba estrutura foun husi estrutura tuan ne’ebé sai ona no atu legalisa lolos katak estrutura ida ne’e mak legal no forte para hodi ita la’o ba oin, ita nia mehi ne’ebe hakarak atu fo indenpendencia ba rai ida ne’e atu povu bele moris ho kontente no alegria sai kontrariu hotu tanba riku soin ne’ebe ita iha povu la sente no sei terus hela liu-liu povu aileba sira,”koalia Prezidente Partidu ASDT, Francisco Xavier do Amaral, hafoin fo pose ba membru estrutura foun iha Reuniaun Konsellu Nasional partidu ASDT nian ,semana kotuk iha Distritu Aileu vila.
Tanba ne’e nia parte apela ba nia militantes sira atu labele fiar rumores ne’ebe mosu maibe kaer liman hamutuk hodi la’o ba oin.
Iha fatin hanesan Joao Antonio Avelino Correia ne’ebe eleitu ba Secretatriu Jerál Partidu ASDT, hateten hanesan Sekjer iha obrigasaun morál no responsabildade atu lori partido ba oin ho diak.
“La’os tanba ambisaun, maibe hau senti katak ne’e hanesan obrigasaun moral no responsabilidade ida hodi kolabora ho prezidente partidu atu lori partidu ne’e ho diak to’o nia rohan, no hatudu katak primeiru partidu indenpendista ho nain ida ne’ebe hakarak atu ukun a’an sai fali atan, no ha’u apela ba militante sira hotu tenki urgullu atu sai militante partidu ASDT,”nia dehan.
Entretantu tuir militante husi grupu Gil Alves konsidera estrutura foun ne’e halo diskriminasaun ba sira tanba sein iha konesementu husi membru ponta leste ne’ebe involve iha patidu desde 2001.
“Ami la konkorda tanba sira halo fali strutura foun hodi hasai ami nia kordenador ponta leste nian sein konesementu no la halo tuir estrutura ne’ebe iha ona 2008, e ami husu ba komite sentral atu hadia fali estrutura ne’e,” hateten Domingos Juvençio, Koordenador ponta leste.
Hatan ba kestaun ne’e, II Adjuntu Secretariu Jerál partidu ASDT, Elidio Mendonça,katak asaun ne’e mosu tanba falta de kordenasaun husi parte leste nian ne’ebé la komprinde konaba mudança ne’e.
“ sira ladun kompriende estrutura ida ne’e tamba desde 2001 to’o agora estrutura ne’e sei nafatin hela ohin ne’e prezidente asina estrutura para atu lori ba Tribunál Rekursu no CNE la’os atu hasai fali ema iha estrutura laran tamba sira ne’e mesak lideransa tuan husi Partidu ASDT nian, e ami fiar katak ami sei hamutuk hodi orienta partidu ne’e,” nia dehan.
Reuniaun ne’e rasik hetan partisipasaun maxiimu husi militante no simpatizante partidu ASDT husi 13 distritu inklui mos konvidados no Presidente Partido Milenium Dezenvolvementu (PMD) nian.
