Membru sira husi Polísia Nasionál Timor-Leste (PNTL) no Polísia Nasoins Unidas (UNPOL) simu tiha ona billete hirak-ne’e atu uza hanesan referénsia imediata ida kona-ba direitu legál sira sidadaun nian.
28 Jullu 2011, Dili – Billete ne’ebé hakerek kona-ba direitu sira sidadaun no akuzadu sira nian, hanesan hatuur ona iha Kódigu Prosesu Kriminál Timor-Leste nian, fahe tiha ona ba membru sira hotu-hotu PNTL no UNPOL nian iha Distritu Dili iha loron Kuarta Feira.
Komandante Jerál PNTL, Longuinhos Monteiro no Komisáriu Polísia UNMIT, Luis Carrilho, iha serimónia ne’ebé hala’o iha Kuartél Jenerál PNTL Distritu Dili, esplika katak buat ida-ne’e hanesan knaar husi membru Polísia ida-idak atu tane aas lei no proteje direitu sira sidadaun hotu-hotu nian.
Billete sira ne’e, ne’ebé prodús ho lian Tetun no Inglés, sei tulun membru polísia sira hodi komprende no esplika kona-ba sidadaun no akuzadu sira-nia direitu.
