Maske dalabarak ona publiku kritika kona-ba plenaria ne’ebe sempre hala’o tarde maibe situasaun ida ne’e laiha mudansa tanba deputadu sira tama tarde.
“Plenaria hahu tarde tanba deputadu sira ne’ebe halo fiskalizasaun iha distritu fila mai tarde, tanba ita hatene katak ita nia estrada mos kuaze kea at hotu,” hateten Deputadu Jaoquin Amaral semana kotuk iha Parlamentu Nasional.
Alende ne’e tuir nia, relasiona ho eleisaun jeral ne’ebe besik ona, oras ne’e dadaun deputadu barak mak desloka ba distritu hodi hasouru malu ho sira nia eleitores sira.
“ne’ebe hau hanoin defisil ba ita atu garantia 100% plenaria la’o tuir tempu no oras ne’ebe iha, tanba plenu menus agora ba oin sira ni atensaun ba liu atividade partidu nian,” nia katak.
Tuir regulamentu Parlamentu nian, tuir los plenaria hahu iha tuku 10:00 maibe dalabarak la tuir regulamnetu ne’e tanba deputadu sira mai tarde.
Entretantu Deputadu Manuel Tilman hateten, atu plenaria bele la’o ho diak liu tan presiza konsiensia husi deputadu sira.
“Kuandu ita hetan konvite bar-barak tenke desidi, tanba hau normalmente la falta plenaria iha Segunda no Tersa e Kuarta no Kinta hau iha komisaun tanba hau mak prejidi komisaun la bele falta,” nia dehan.
Tuir Prezidente Komisaun C Parlamentar ne’e katak, dalabarak deputadu sira seidauk to’o oras maibe sira fila uluk tiha ba uma.
“Hau hakarak hateten deit katak iha ne’e kolega balun mai sadere iha didin sira ne’e halo didin foer hotu maibe la to’o minutu sanulu fila tiha ona ba uma, dalaruma iha korum komisaun nian, prezidente komisaun tenke telephone sira, “ nia preokupa.
“Hahu hein katak kuandu hahu fali iha dia 15 Agustu , deputadu sira tenke tama no sai ho oras no protividade povu vota ba sira, liu-liu deputadu husi partidu bo-bo’ot sira,” nia esperansa.
Entretantu membru Komisaun I ne’ebe trata asuntu Etika no Mandatu Deputadu sira nian, Deputada Jacinta Pereira hateten , plenaria hahu tuku 10 maibe dala barak deputadu mai tarde tamba iha preokupasaun barak.
“Maibe nudar reprezentante povu iha um afukun ida ne’e ita tenke hatene ita nia dever, tenke iha konsiensia rasik, saida mak ita halo ba povu nia nesesidade,” nia dehan.
