Estudante feto na’in 80 husi eskola Sekundáriu iha Munisípiu Lautem no Oekusi envolve iha projetu Formasaun Abilidade ba Partisipasaun Ekonómika (FAPE) hodi prepara jestaun finansiál ba moris iha futuru.
Ministra Ministériu Edukasaun (ME) Dulce de Jesus Soares hateten, projetu ne’e UN Women mak apoiu ME hodi fó oportunidade ba estudante feto sira liu-liu iha área rurál hodi dezenvolve sira-nia abilidade kona-ba jestaun finansiál.
“Projetu FAPE ne’e ita inklina ona estudante feto liu-liu iha área rurál husi Munisípiu Lautem no Oecusse hamutuk walu-nolu (80) hodi hasa’e sira-nia koñesimentu jestaun moris ka bainhira kria negósiu ruma,” nia informa.
Nia dehan, projetu ne’e implementa ona durante fulan neen (6) no UN Women no ME sei halo monitorizasaun hodi haree niarezultadu implementasaun, nune’e bele implementa fali ba eskola sira seluk.
“Projetu ida-ne’e importante tebes, tanba kontribui ba estudante sira oinsá atu ko’alia kona-ba litérasia finansiál, emprendedorizmu no abilidade ba dijitalizasaun nian ba estudante feto sira bele komprende,” Ministra ME Soares saliente iha Vila-Verde.
Alende ne’e nia dehan, FAPE apoia feto foin-sa’e rurál sira hodi hametin kompeténsia profisionál, emprezariál, no prontu ba merkadu no avansa dezenvolvimentu abilidade ba partisipasaun ekonómika.
Entretantu, estudante Maia Gonçalves husi eskola Sekundáriu Jerál Nino Konis Santa iha munisipiu Lautem dehan, projetu refere kontribui tebes ba feto foin-sa’e sira oinsá bele prepara sira-nia kapasidade hodi halo jestaun ba negosiu ki’ik sira ne’ebé iha.
“Liu-hosi projetu ida ne’e fó hanoin oinsá ha’u bele dezenvolve di’ak liutan negosiu ki’ik ne’ebé ha’u iha ona antes ne’e,” nia informa iha resintu Edifísiu ME, Díli.
Nia dehan, negosiu ki’ik ne’ebé nia iha mak hanesan faan es boba iha área eskola Sekundáriu Jerál Nino Konis Santa Lautem nian, negosiu ne’e kria liuhusi formasaun antes ne’e nia hetan husi UN Women rasik iha Lautem no to’o ikus nia iha ideia hodi kria negosiu ne’e ho orsamentu rasik hamutuk $500.
“Liuhusi ideia foun sira ne’e ha’u hetan husi projetu ne’e fasilita liutan ha’u iha negosiu ki’ik,” estudante Gonçalves hatete.Nia espera katak kolega hirak ne’ebé partisipa iha formasaun ne’e bele aproveita didi’ak hodi dezenvolve sira-nia koñesimentu hodi kria negosiu ki’ik sira.
