Ministériu Obras Públikas rekoñese problema inundasaun iha Díli seidauk hetan solusaun, bainhira tama ba tempu udan boot, tanba sistema drainajen seidauk responde ho medida ne’ebé sufisiente.
Ministru ba Ministériu Obras Públikas, Samuel Marçal hateten, estudu kona-ba projetu drainajen ne’e halo husi konsultante husi Portugal iha tempu liu ba, maibé implementasaun foin mak la’o agora.
“Revizaun foun ne’e permiti atu prepara projetu drainajen hodi akumula volume bee husi Kaikoli, Vila Verde no Audian,” hateten Ministru ba MOP Marçal, iha Porto, Díli.
Ministru ba MOP mós afirma, problema mak iha ne’ebé bee tuun la hetan dalan loos ba tasi. Husi drainajen ki’ik sira, bee intupidu mosu inundasaun iha uma-laran no estrada, halo moras ba komunidade.
“MOP bele garanta katak, bainhira projetu drainajen remata, inundasaun iha Díli sei redús substansialmente, maski ita seidauk bele promete katak kapital sei livre totalmente, maibé ita iha konfiansa katak projetu ida-ne’e sei muda situasaun,” hateten Ministru Marçal.
Nia hatutan, sistema drainajen foun sei monta iha área Ministériu Justisa no Universidade Nasionál Timor Lorosa’e (UNTL), hamutuk ho instalasaun filtrasaun iha ponte hodi separa masa no plástiku. Governu planu atu finaliza projetu ida-ne’e iha fulan Janeiru 2026.
Nia dehan, husu pasiénsia hosi populasaun, tanba governu sei kontinua implementa Projetu Drainajen (D4), ne’ebé konsidera parte fundamental ba solusaun inundasaun iha kapital Díli.
Entretantu, Primeiru-Ministru, Kay Rala Xanana Gusmão mós foti atensaun ba área kritiku sira prepara sistema ida ne’ebé bele evita bee hakmatek tuun de’it iha tasi-ibun, hanesan mosu dala barak iha portu Díli.
“Ita hotu hatene problema ida-ne’e la’ós foun. Governu sei fó prioridade ba implementasaun projetu drainajen ne’ebé hetan ona suportu internasionál. Ami hakarak Díli sei sai sidade ida ne’ebé seguru no reziliente ba gerasaun oin,” Primeiru-Ministru Xanana hateten.Nia afirma, drainajen ne’e nia medidu naruk sei 800 metru ho largura 5 metru. Projetu implementa ho durasaun servisu sei halao fulan neen no total orsamentu hetan USD$1,1 milliaun.
