Jardin BJ Habibi ne’ebé lokaliza iha área Cristo Rei, iha kapital Dili, sai hanesan destinasaun turistiku favoritu ba vizitante lokál no internasionál, maibé ai-funan sira iha fatin refere komesa mate tanba la hetan manutensaun regulár husi autoridade relevante sira iha Munisípiu Díli.
Vizitante Isabel Amaral hatete, ai-funan sira ne’ebé antes ne’e koloridu, fresku no beleza natural, agora komesa muda ho kór mean no estraga beleza fatin rekreativu ne’e.
“Ita halo paisajen iha ne’e atu hetan fresku, maibé haree ai-funan barak mate, hanesan la iha atendimentu. Ami husu atu autoridade lokál ka munisipiu fó atensaun, tanba Jardin Habibi mak identidade ekoturismu Díli,” Isabel deklara iha Jardin BJ-Habibi, Bidau, Díli.
Nia dehan, husu ba autoridade relevante atu halo intervensaun urjente no sujere kampaña voluntáriu rega no kuda ai-funan foun, nune’e bele hadia imajen fatin rekreativu ne’e.
“Fatin ne’e importante tebes para família sira loron-domingu. Maibé ita hanoin karik labarik sira haree ai-funan mate, sira mós senti la kontente. Governu tenke halo buat ida para la bele hamosu Díli hanesan la iha kuidadu.” Nia afrima.
Estudante husi Universidade Nasional Timor Lorosa’e (UNTL), Maria Lopes hateten, fatin rekreativu hanesan Jardin Habibi iha funsaun edukativu no sosial.
“Ita aprende atu valoriza natureza, bainhira ai-funan sira mate, ita mós aprende katak governu la fó prioridade. Ha’u hanoin voluntáriu husi juventude bele ajuda no rega ka kuda foun, maibé nesesáriu de’it autoridade fó suporta,” nia dehan.
Iha parte seluk, Prezidente Autoridade Munisípiu Díli, Francisco dos Santos esplika, servisu reabilitasaun sei halo iha jardin sira iha Díli, inklui perfurasaun bee no instalasaun sistema bomba.
“Dadaun ami hein fulan rua tan hanesan ne’e ami atu tau tanki bee nian hodi rega ai-funan, maibé tinan oin, ita sei preve orsamentu espesiál atu instala sistema bee permanente iha jardin sira, ho valór aproximadu USD$100,000 para bele fó sustenta manutensaun no rega ai-funan,” dehan PAM Díli Santos.
Nia akontese, maski enfrenta limitasaun, ekipa verde husi Autoridade Munisípiu Díli kontinua lao hela iha terenu atu halo limpeza no kuida parte jardin.“Iha fulan rua ne’e, ami sei buka alternativa hodi garante bee, atu Jardin Habibi no jardin sira seluk iha Díli laran bele hetan manutensaun regular,” dos Santos aumenta.
