Estadu Unidos Amérika (EUA) apoiu Ministériu Defeza hodi halo manutensaun ba infraestrutura militár hanesan, areoportu Lanut Baucau, kazerna-militár, nune’e mós apoiu Ezersísiu Harii Hamutuk.
Ministru ba Ministériu Defeza Kontra Almirante Donaciano Costa Gomes “Pedro Klamar Fuik” dehan, kooperasaun entre Timor-Leste no EUA iha quadru koperasaun ne’ebé mak estabelese, sira iha orsamentu apropriadu hodi fó apoiu ba militár sira.
“Dadaun ne’e EUA apoiu manutensaun ba infraestrutura militár hanesan, aeroportu Lanut Baucau, konstrui kazerna hamutuk 25 iha Metinaro, nune’e mós partisipa iha Ezersísiu Harii Hamutuk,” nia dehan.
Ministro dehan, alende apoiu manutensaun ba infraestrutura militár EUA mós apoiu formasaun ba militár sira, intrega mós Hangar Aviaun nian no Armajen Asisténsia Umanitária no Auxiliu Dezastre (HADR) ba Komponente Aérea F-FDTL iha Baucau.
Nia informa Timor-Leste ho EUA nia relasaun amizade hahú kedas dezde tinan 2002 husi tempu restaurasaun independénsia to’o agora.
“Ita sei prepara referénsia koperasaun internasional defeza nian. Ba oin bele hahú fali kooperasaun entre Timor-Leste ho EUA bele la’o di’ak liu tan iha futuru,” Ministru MD Pedro Klamar Fuik salienta.
Enkuantu nia dehan, dadaun ne’e EUA mós halo atividade balun ne’ebé apoiu ba iha komunidade sira iha Timor-Leste, nune’e mós sira halo destakamentu sivil sira tulun komunidade.
Entretantu, Jenerál Steven S. Nordhaus, Xefe Gabinete Guarda Nasional, mai iha Timor-Leste dehan, importansia hosi kooperasaun kontinua entre EUA ho Timor-Leste iha setór defeza no vizaun hamutuk ba futuru ida ne’ebé seguru no prósperu.
“Iha ámbitu programa parseria estadu nian, EUA nia kompromisu ba tempu naruk hodi reforsa lasu seguransa nian ho Timor-Leste, nune’e mós apoiu dezenvolve infraestrutura militár nian,” nia informa.
Nia dehan, alende ne’e foka mós ba hakle’an koperasaun militár bilaterál, hasa’e kapasidade defeza nian, no fasilita interkámbiu estratéjiku sira hodi apoia estabilidade no seguransa rejionál iha Indo-Pasifiku.Alende ne’e mós EUA apoiu fasilidade foun no sei hasa’e F-FDTL nia kapasidade hodi resposta ba dezastre no prontidaun operasionál, hodi reforsa Timor-Leste nia reziliénsia no seguransa.
