Governu liuhusi Ministériu Edukasaun (ME) kria tan eskola pre-eskolár hamutuk 34 iha munisipíu rua (2) inklui Baucau no Bobonaro.
Ministra ME, Dulce de Jesus Soares dehan tuir sensus hatudu katak taxa partisipasaun labarik husi tinan 3-5 menus iha eskola pre-eskolár sira iha Munisípiu Baucau no Bobonaro.
Nia dehan, ministério servisu hamutuk ho parseiru Koica, no UNICEF (United Nations Children’s Fund) hodi kria tan eskola pre-eskolár ba iha munisípiu rua-ne’e refere hodi bele fasilita labarik sira asesu ba ensinu pre-eskolár molok ba ensinu primáriu.
“Orsamentu ba kontrusaun ne’e hamutuk $6 milhões no konstrusaun ne’e durasaun ba tinan lima nia laran,” Ministra Soares informa.
Nia hatete, konstrui eskola pre-eskolár 34 ho saladeaula neennulu resin ualu (68) inklui formasaun ba profesór nomós formasaun ba inan-aman sira, nune’e inan-aman sira iha konsiénsia hodi haruka oan ba fasilidade pré-eskolár sira.
Enkuantu nia dehan, projetu kriasaun ne’e hahu ona no durasaun iha tinan lima (5) laran eskola pre-eskolár 34 ne’e tenke finaliza no oferese ba estudante sira bele utiliza ona.
Entretantu, Koordenadór Rede Edukasaun Timor-Leste Coalition for Education (TLCE) Jose Monteiro dehan, eskola pré-eskolár sira refere importante tebes hodi prepara mentalidade no pensamentu labarik husi tinan 3-5 molok tama ba nivel primáriu.
“Pre-eskolár ne’e prepara labarik sira koñese letra, sura, koñese kores no dezeñu, atu nune’e ba primária sira aprende forma susun letra sira nune’e mós númeru no sira aprende ona atu le’e no matemátika,” nia dehan.
Nia dehan, ministério iha kompeténsia tomak hodi prepara fasilidade ne’ebé mak di’ak no dignu ba labarik sira iha pre-eskolár.
“Ita husu mós halo sosializasaun ba inan-aman sira atu bele lori oan ba aprende uluk iha pre-eskolár uluk mak ba primáriu,” Koordenadór TLCE Monteiro informa.Nia dehan, TLCE apoiu programa hotu ne’ebé governu liu-liu ME halo hodi kontribui ba dezenvolvimentu abilidade labarik sira-nian, maibè husu atu kontrusaun ne’e prepara mós ho fasilidade kompletu.
