Ministériu Transporte no Komunikasaun (MTK) implementa taxa administrativu ligadu ho servisu kontrolu ba lemite pezu ba transportasaun merkadoria.
Ministru Transporte no Komunikasaun Miguel Markes Gonçalves Manetelo dehan, implentasaun selu taxa ne’e bazeia ba diploma ministeriál hodi regula aktu no servisu administrativu sira.
“Bazeia ba diploma ne’e Ministériu Transporte no Komunikasaun implementa taxa administrativu ba transportasaun merkadoria sira,” nia dehan.
Nia dehan, selu taxa ne’e tuir númeru roda nian $30 ba veikulu roda haat (4) $35 ba roda neen (6) $40 ba roda ualu (8) no $45 ba veíkulu roda 10 ka liu.
“Bainhira la kumpri hodi selu taxa ita sei bandu sirkulasaun veíkulu ida nian to’o nain selu taxa selae ita prosesu tuir lei,” nia hatete.
Nia hatete, dekretu lei ne’e ho objetivu atu kuntribui ba prezervasaun infraestrutura estrada no ponte hadia seguransa iha trafiku automóvel no garante kumprimentu ba padraun legál husi operadór transportasaun merkadoria nian.
Alende ne’e nia dehan, veíkulu estadu forsa defesa no seguransa, misaun diplomatika no entidade públika sira seluk sei hetan izensaun husi regulamentu ida ne’e.
Entretantu Deputada Maria Angelina Sarmento dehan, implementasaun taxa ba transportasaun merkadoria ne’e di’ak, maibé se di’ak liu implementa ba taxa importasaun nian.
“Foos importadu iha merkadu uluk ninia taxa impostu seletivu konsumu hatun ba 2.5%, maibé iha merkadu foos kilograma 20 ho presu $18 no kilograma 25 ho presu $20 to’o $22,” Deputada Sarmento hatutan.
Nia dehan, tanba husu atu haree uluk taxa ba importasaun foos iha merkadu la’o di’ak tiha ho situasaun mak haree fali taxa ba transportasaun merkadoria sira.
