Funsinariu Autoridade Protesaun Civil (APC) halo doasaun ran hodi oferese ba Hospital Nasional Guido Valadares (HNGV) atu bele ajuda pasiente sira ne’ebé presiza ran.
“Ami sempre asesu media katak, pasiente sira iha HNGV presiza ran, ho ami-nia misaun katak, serbí no proteje sidadaun sira, entaun ida-ne’e mós parte ida husi ami-nia misaun, ho ami-nia ran turuk ida bele salva ema seluk nian vida,”hatete Sekretáriu Estadu Protesaun Sivíl (SEPS) Domingos Mariano Reis iha ámbitu komemorasaun loron Mundial Redusaun Risku ba dezastre naturais ba dala 17 ne’ebé akontese iha 30 de Outubru tinan 2024 ba dala 17, iha Edifísiu APC, Caicoli, Díli.
Nia dehan, pasiente sira iha HNGV presiza tebes ran, tanba ne’e funsionáriu hotu voluntáriu hasai ran hodi oferese ba Banco de Sange, tanba ran turuk ida bele salva ema nian vida.
“Funsionáriu obrigatóriu hasai ran, só ba sira ne’ebé moras mak labele, hotu-hotu bele hasai ran, tanba ran turuk ida iha valór ne’ebé boot tebes,”nia Informa.
Nia dehan, doasaun ran ne’e APC servisu hamutuk ho OMS, HNGV no Cruz Vermelha Timor-Leste.
Iha fatin hanesan Xefe Departamento Banco de Sange iha HNGV, Alexandrino Mendonça deklara, Banco de Sange ne’ebé hamahon aan iha HNGV, mai halo doasaun ran iha APC no apresia tebes ba funsionáriu sira ne’ebé voluntáriu hodi fó sira-nia ran.
“Ami agradese tebes ba APC, tanba bele halo atividade doasaun ran ne’e, hanesan ita hotu hatene katak, ho kazu balun ne’ebé presiza tebes ran, sei ita-nia ran la garante iha HNGV maka pasiente balun bele lakon vida,” nia esplika.
Nia hatutan, ran turuk ida bele salva ema nia vida, tanba ne’e ba funsionáriu hotu tenke iha konsiénsia tomak hodi halo doasaun ran ba Banco de Sange, hodi bele ajuda pasiente sira ne’ebé presiza ran.
