Estudante bolseriu hamutuk rihun liman (5000) kompostu husi sira ne’ebé hala’o estudu iha rai-liur no rai-laran, remata ona sira-nia estudu no kontribui ona iha instituisaun públiku no privadu sira tuir área ne’ebé sira hili.
Diretór Ezekutivu Fundu Dezenvolvimentu Kapitál Umanu (FDCH) Julio Aparício dehan, durante ne’e estudante bolseiru ne’ebé FDCH apoiu ne’e hamutuk 12 mil mak hala’o estudu iha rai-liur no rai-laran, husi bolseiru hirak ne’e maiória husi enfermajen, tanba tuir nesesidade.
“Husi total 12 mil bolseiru ne’ebé Fundu Dezenvolvimentu Kapitál Umanu (FDCH) apoiu ne’e iha rihun 5 mak remata ona sira-nia estudu no dadaun ne’e kontribui ona iha instituisaun públiku no privadu sira iha Timor-Leste,” nia dehan.
Nia dehan, dadaun ne’e bolseriu sira ne’ebé mak sei hala’o hela estudu hamutuk rihun 7 resin.
“Bolseriu sira ne’ebé mak dadaun ne’e halo estudu maioria iha área saúde hanesan Parteira, Medisina Jeral,” Diretór Ezekutivu FDCH Aparício dehan.
Enkuantu nia dehan, estudante bolseiru hirak ne’e hahu eskola iha tinan 2011 too mai 2024.
Entretantu Koordenadór Timor-Leste Coalition for Education (TLCE) Jose Monteiro dehan, governu liuhusi FDCH tenke iha dadus fixu kona-ba estudante bolseiru sira.
“FDCH tenke iha dadus fixu kona-ba estudante bolseiru sira,atu nune’e ita bele hatene, hira mak remata ona estudu no hira mak seidauk, hirak mak servisu ona hirak mak seidauk, estudante bolseiru sira-ne’e bainhira remata sira-nia estudu governu tenke utiliza sira atu bele kontribui ba dezenvolviventu nasional liuhusi área ne’ebé sira aprende,” nia dehan.
Tanba ne’e nia dehan, estudante bolseriu hirak ne’e governu gasta osan barak hodi selu sira-nia eskola no alojamentu, tanba ne’e fila mai tenke utiliza sira la’ós abandona sira.
