United Nation Population Fund (UNFPA) apoiu Asosiasaun Parteira Timor-Leste (PAPTL) hodi realiza sensibilizasaun ba parteira sira kona-ba setór saúde nia papél atu oinsá bele responde ba violénsia bazeia ba jéneru iha Timor-Leste.
Iha okaziaun refere Vise-Prezidente APTL, Ijabelita Madeira Fernandes hateten, semináriu ne’e importante tebes ba parteira sira, tanba sira mak hatene di’ak problema inan sira-nian, bainhira ba halo tratamentu, entaun parteira presiza hetan treinamentu kona-ba violénsia bazeia ba jéneru.
“Durante ne’e parteira sira deteta ona kazu barak kona-ba violénsia bazeia ba jéneru, tanba inan isin-rua sira-ne’e mai primeiru halo tratamentu ne’e hasoru uluk parteira sira, entaun bainhira parteira sira halo investigasaun ba inan isin-rua sira mak hetan kazu ruma, entaun parteira sira refere kedas ba iha médiku sira no parte seluk ne’ebé haree kona-ba problema sira-ne’e,” nia dehan.
Nia hatutan, bainhira inan isin-rua sira ba halo tratamentu parteira sira simu sira uluk, tanba ne’e parteira mak hatene didi’ak problema ruma ne’ebé inan isin-rua ne’e hasoru, tanba ne’e liuhusi semináriu ne’e bele kapasita parteira sira oinsá bele halo servisu profisionál liutan.
“Agora dadaun parteira sira-ne’e tuir ona treinamentu kona-ba violénsia bazeia ba jéneru ne’e hamutuk na’in 100 ona, tanba ne’e parteira sira ne’ebé servisu iha sentru saúde sira-ne’e tenke tuir hotu treinamentu kona-ba violénsia bazeia ba jéneru,” nia esplika.
Iha fatin hanesan reprezentante United Nation Population Fund (UNFPA) Dra.Domingas Bernardo hateten, parteira sira ne’ebé servisu iha sentru saúde sira iha munisípiu ne’e, servisu ho di’ak, tanba sira-ne’e treinadu ona.
“Parteira sira ne’ebé mak servisu iha sentru saúde sira hanesan iha Vera Cruz, Formoza, Liquisa, Viqueque, parteira sira-ne’e atende ho di’ak, tanba sira treinadu tiha ona no sira iha fatin propriadu la’ós fatin ne’ebé hamutuk ho pasiente seluk, tanba ne’e mak UNFPA harii fatin seguru ne’e iha sentru saúde sira atu oinsá bele trata inan sira ho di’ak,” nia dehan.
Nia salienta, UNFPA harii ona fatin seguru ne’e iha sentru saúde 8, atu oinsá bele rezolve problema sira-ne’e ho seguru, tanba ema ida mai ho asalta seksuál, entaun presiza duni fatin ne’ebé seguru atu bele rezolve, tanba ne’e mak Ministériu Saúde husu atu aumenta tan, fatin seguru iha sentru saúde sira iha munisípiu.
