Ministériu Ensinu Supérior Siénsia no Kultura (MESSK) husu universidade sira ne’ebé loke ona klase parabelu tenke priense kritériu ne’ebé mak governu atribui ona.
Ministru MESSK Jose Honório da Costa Pereira Jerónimo dehan, universidade ne’ebé mak loke klase paralelu iha munisípiu tenke integra ba kritériu ne’ebé ministériu hasai, bainhira la kumpri tenke taka.
“Ita husu universidade sira ne’ebé loke ona klase paralelu iha munisípiu tenke hadia no kumpri kritéria sira ne’ebé mak ministériu hasai hodi fó lisensa ba estabelesimentu ba klase paralelu,” nia informa.
Nia dehan, MESSK halo ida-ne’e atu bele aposta ba kualidade, tanba ministériu lakohi estabelese no estudante sira selu no hanorin de’it estudante sira ida-ne’e labele akontese.
Tanba ne’e nia dehan, ekipa sei tun ba halo survei hodi haree universidade sira ne’ebé loke klase paralelu iha munisípiu la prense kritériu tenke taka.
Iha parte seluk Reitór Universidade da Paz (UNPAZ) Adolmando Amaral dehan, Universidade da Paz loke klase paralelu tolu iha Munisípiu Covalima, Oecusse no Liquiçá, iha tinan kotuk ekipa husi MESSK ba halo ona avaliasaun.
“Rekomendasaun husi avaliadór sira ne’e fó mai ami tinan 2 atu kompleta indikadór 16 ne’ebé mak sei falta agora dadaun ami husu fali para avaliadór sira ba halo fali avaliasaun,” nia hatete.
Nia hatete, proposta sira submete ona ba ministériu no hein de’it avaliadór sira hodi ba halo reavaliasaun ba klase paralelu tolu iha Munisípiu Covalima, Oecusse no Liquica.
“Bainhira ita seidauk priense ita sei la’o nafatin hodi priense la’ós ministériu mai haruka taka, tanba ne’e ida ne’ebé mak menus haruka kompleta ami prontu kompleta,” Reitór UNPAZ Amaral saliente.
Enkuantu nia dehan, indikadór neen (16) ne’ebé mak presiza priense ne’e mak hanesan, kampu, jadin, uma, bee moos no seluk tan.
