Menus fasilidade hanesan kamera, tripod, komputadór, recorder difikulta estudante sira iha Departamento de Comunicação Social (DCS), Faculdade de Ciências Sociais, Universidade Nasional Timor Lorosa’e (UNTL), bainhira tama ba iha tempu prátika.
Adelina Xavier Menezes nu’udar Estudante DCS nian deklara, fasilidade menus no barak mak avaria ona difikulta sira atu halo prátika ho di’ak.
“Kona-ba fasilidade departamentu nian ita harre ba menus kamera, komputadór sira-ne’e avaria, entaun difikulta ami iha tempu prátika. Enkuantu materiál sira iha departamentu la kompletu no barak mak avaria ona, tanba ne’e bainhira ami tun ba terenu hodi prátika, ami barak mak uza rasik ami-nia kamera hodi tuir prátika no balun ne’ebé laiha hein malu de’it,” dehan estudante Adelina.
Nia rekomenda, atu parte relevante bele tau matan no hatán lalais ba sira-nia preokupasaun hirak ne’e.
“Ami mós husu ba parte relevante sira, atu bele tau matan mai ami-nia departamentu Comuniçăo Social, li-liu ba ami-nia materiál sira hanesan kamera, komputadór no seluk tan atu ami bele prátika ho di’ak” nia rekomenda.
Iha fatin hanesan Dekanu Faculdade de Ciências Sociais Alarico da Costa Ximenes hateten, Fakuldade seida’uk bele solusiona problema ne’e, tanba seidauk simu karta pedidu husi departamentu.
“Ha’u hanoin ida-ne’e sai mós hanesan ita hotu nia preokupasaun, maibé até agora ha’u seidauk simu relatóriu ka karta pedidu husi departamentu, se sira fó mai ona karik ita bele atende asuntu ne’e, tanba ne’e hanesan dekanu bele kontinua ba universiade,” dehan Dekanu FCS.
Relasiona ho preokupasaun ne’e, Diretór Departamento de Comunicação Social Roberto da Costa Pacheco dehan, loos duni fasilidade iha laboratóriu Multimédia departamentu nian barak mak avaria ona.
“Klaru ita-nia ekipamentu prátika sira ne’ebé maka agora dadaun iha laboratóriu Multimedia ne’e, iha balun mak aat, tanba Ar Kondisionadu (AC) la funsiona hotu ona, tanba ne’e maka sasán ne’ebé ita hetan ajudu hosi UTS (University of Tehcnology Sidney-Austrália), maibé iha lubuk ida maka avaria,” dehan Diretór Pacheco.
Nia salienta, sei hatán estudante nia preokupasaun sira no iha tempu besik sei halo karta pedidu ba fakuldade hodi bele rezolve problema ne’e.
“Departamentu la nonok ho situasaun ida-ne’e, iha diretór sesante nia liman ita halo ona pedidu ba iha dekanu fakuldade sesante mas la konsege rezolve, maibé ita espera katak ita-nia dekanu foun ho inisiativa foun bele rezolve situasaun ne’ebé mak ita enfrenta.
Agora departamentu sei halo karta pedidu foun ba dekanu nune’e dekanu bele halo fali pedidu foun ba universidade, nune’e bele rezolve tiha problema ne’ebé mak ita hasoru,” nia hakotu.
