Adjuntu Diretór Fundasaun Ahisaun Domingos do Rego dehan, ema ho kondisaun difisiente na’in-ualu (8) mak loke Eskola Sekundáriu Tékniku Informátika ida iha Metinaro.
Nia dehan, iha Fundasaun Ahisaun ema difisiente ne’ebé asesu ba edukasaun formal no finaliza ona iha nivel universidade ne’e hamutuk na’in tolunulu resin lima (35).
“Husi sira na’in-35 ne’e iha sira na’in-8 mak harii ona Eskola Sekundáriu Tékniku Informátika ida iha Metinaro ne’ebé mak dadaun ne’e asesu husi ema ho kondisaun difisiente no ema la ho difisiente,” nia hateten.
Nia dehan, ida-ne’e hatudu katak, Fundasaun Ahisaun la’ós fasilita de’it ema ho kondisaun difisiente hodi asesu ba edukasaun, maibé fó mós edukasaun ba ema seluk ne’ebé presiza.
Nia dehan, iha eskola ne’e tau hamutuk ema difisiente no sira ne’ebé la ho difisiente liuhusi edukasaun inkluziva.
Alende ne’e nia dehan, la’ós de’it iha edukasaun formal, maibé eskola refere iha mós edukasaun informal liu-liu fasilita formasaun kona-ba komputadór.
“Kada tinan ema difisiente ne’ebé tuir formasaun komputadór ne’e másimu na’in-20 husi sira ne’e balun servisu ona iha instituisaun governu no organizasaun balun iha Timor-Leste,” nia dehan.
Entretantu Koordenadór Rede Edukasaun Timor-Leste Coalition for Education TLCE Jose Monteiro dehan, difisiente ne’e iha fizika de’it la’ós iha hanoin, tanba ne’e orgullu tebes ho maluk difisiente sira ne’ebé loke ona Eskola Sekundáriu Tékniku Informátika iha Metinaro.
“Eskola Sekundária Tékniku Informatika ne’ebé mak ita-nia maluk difisiente sira loke iha Metinaro, ajuda tebes ita-nia alin estudante sira iha área ne’ebá,” nia hatete.
Nia dehan, iha eskola ne’e sei menus hela ekipamentu prátika balun, tanba ne’e Ministériu Edukasaun tenke apoiu hodi kompleta.
