Diretór Sentru Saúde Munisípiu (SSM-Ermera), Antonio de Deus Fatima hateten loos duni katak kombustível ambulánsia foin lalais la iha, tanba ne’e kondutór husu família pasiente sira atu ense kombustível rasik tanba hakarak atu salva inan isin-rua ne’e nia vida.
“Loos duni momentu ne’e ami-nia kombustível laiha duni, kronolojia mak hanesan kombustível husi Ministério mai data 23/03/2024 no kombustível hotu iha 28/04/2024, intervalo kombustível laiha ne’e loron 2 de’it, husi dia 28 to 29/04/2024, depois dia 30/04/2024 mais ou menus tuku 15.00 kombustível tama fali ona,” nia haktuir ba Jornalista TDW liuhusi Via WhatsApp.
Nia hatutan, kombustível durante loron rua la iha, tanba ne’e bainhira komunidade balun mak hetan susar, entaun sira ense kombustível ba ambulánsia atu nune’e bele tula sira hodi mai halo tratamentu iha sentru saúde atu nune’e bele salva pasiente sira-nia vida.
“Ami halo ona esplikasaun katak pasiente sira bele ense lai atu salva inan isin-rua ne’e nia vida pois halo resibu no ami reinbolsa fali sira-nia osan,” nia salienta.
Iha fatin seluk Diretór Ezekutivu (FONGTIL), Valentim da Costa Pinto hateten Ministériu Saúde kuandu la tau atensaun ba ambulánsia sira ba problema hanesan ne’e sei fó inpaktu ba komunidade sira bainhira hetan moras ruma.
“Ami la aseita tebes kuandu komunidade mak hola fali hodi bele sustenta fali problema sira-ne’e. Komunidade iha obrigasaun duni, maibé la’ós ida ne’ebé bele fó fali impaktu ba sira. Ministériu Saúde iha duni obrigasaun atu jestaun ne’ebé di’ak hodi asegura tratamentu ba komunidade sira liuliu ba inan feton sira,” nia dehan iha Hotel Timor, Díli.
Nia hatutan, Ministériu saúde tenki tau atensaun ba sasan sira-ne’e liuliu ambulánsia, tanba komunidade sira hetan susar ruma, ambulánsia tenke to’o lalais hodi ajuda, la’ós ambulánsia atu ba tulan ema moras tenke ense kombustível rasik, ida labele, husu ministra saúde atu rezolve problema sira ne’e ho sériu.
