Diretór Ezekutivu Konsellu Nasional Seguransa Aihan no Nutrisaun Timor-Leste (KONSSANTIL) Comar Mendonsa hateten, iha Timor-Leste labarik tinan lima (5) mai karik kuaze afeta ba mal-nutrisaun krónika.
Nia dehan, labarik sira ne’ebé tinan lima mai kraik kuaze afeta ba mal nutrisaun ne’e, tanba labarik sira-ne’e la konsumu ai-han ne’ebé ho nutrisaun di’ak, tanba ne’e presiza fó ai-han ne’ebé iha nutrisaun ne’ebé di’ak atu nune’e iha futuru sira bele sai husi mal-nutrisaun ne’e.
“Labarik sira ne’ebé afeta ba mal-nutrisaun króniku ne’e maioria iha nivel rurál sira mak afeta liuba problema ne’e, entaun papél governu nian para atu bele halo polítika ne’ebé adekuadu ba liu iha baze para hodi bele fó kontribuisaun másimu ba ai-han ne’ebé nutritive, nune’e ita bele redús tasa mal-nutrisaun iha ita-nia rai no mós redús insiguransa alimentár,” nia dehan hafoin partisipa iha workshop kona-ba nutrisaun no seguransa alimentár iha salaun JL-Vila, Fatuhada Komoro, Díli.
Nia dehan atu redús tasa mal-nutrisaun ba labarik sira mak presiza enkoraja labarik sira atu konsumu ai-fuan ne’ebé iha nutrisaun di’ak, no mós tenke lori labarik sira ba vizita sentru saúde sira atu nune’e bele kontrola labarik sira nia saúde.
Nia salienta, inan-aman sira presiza kuidadu oan sira bain hira han buat ruma, la bele husik labarik sira ba naran han de’it, ai-fuan sira ne’ebé fo’er, inan aman sira mak tenke fó ai-han ne’ebé mós no di’ak ba oan sira, atu nune’e labarik sira ne’e labele moras.
Iha fatin hanesan, Prezidente Instituto para Defesa dos Direitos da Criança (INDDICA, I.P) Dinorah Garanadeiro hateten, nutrisaun sai hanesan direitu fundamentu ida liuliu ba labarik sira, tanba ne’e estadu Timor-Leste presiza tau atensaun ba nutrisaun liuliu ba labarik sira.
“Iha diskusaun ne’e oinsá instituisaun sira ne’ebé maka servisu ba área nutrisaun nian no seguransa alimentár atu bele diskute no haree hamutuk estratéjia saida mak governu ida ne’e bele tau hodi nune’e hodi haree ba asuntu nutrisaun ne’e liuliu ba liña ministériu relevante sira. Husi instituisaun INDDICA, I.P ne’e foka liu ba servisu asuntu labarik tanba asuntu nutrisaun sai mós prioridade ida husi direitu fundamentu ba labarik,” nia dehan
Nia hatutan, tuir dadus ne’ebé iha hatudu katak Timor-Leste sai hanesan nasaun ida ne’ebé númeru 3 ba mal-nutrisaun husi nasaun sira seluk ne’ebé mal nutrisaun aas liga liuba rais badak estantin, kontribuisaun ba iha estantin ne’e la’ós de’it mai husi ai-han, maibé presiza hadi’a mós sistema sira seluk hanesan ijiene bee ida sai mós hanesan fatór ida ne’ebé kontribui ba mal-nutrisaun.
