Presidente Cruz Vermeilha Timor-Leste (CVTL), Madalena Hanjam hateten sira halo hela esforsu atu mobiliza fundu humanitaria iha mundu hodi ajuda povu kibi’it laek sira ne’ebe dadaun ne’e enfrenta menus aihan.
Nia salienta, sira estabelese ona sentru logistika aihan ba vulneravel tanba iha tempu badak sei hetan apoia husi nasaun amigu sira hanesan Singapura, Macau, Indonesia, no Australia.
“Mobilizasaun osan husi mundu tama ona kuaze $200,000, no husi governu $100,000, husi doasaun ki’ik sira lato’o $10,000. Kontinuasaun ba ida ne’e ita hadia didiak ita nia proposta atu hetan diak liu husi liur tanba nasaun hotu iha direitu hetan fundu bo’ot husi fundu global,” nia hateten iha servisu fatin Formosa, Dili.
Nia haktuir, aihan ne’e nesesidade baziku ba ema no importante ba iha saude ema nian tanba ne’e aihan ne’ebe apoia ba vulneravel sira mos tenke iha valor nutrisaun, atu labele kria fali problema malnutrisaun iha rai laran.
Nia informa armajen CVTL nakloke ba individu no grupo sira ne’ebe iha kapasidade ekonomia oituan atu bele ajuda sidadaun sira ne’ebe presiza aihan iha situasaun krize ida ne’e.
Enkuantu, Xefe do Suku Kaikoli, Hipolitu Marques hateten komunidade balun komesa halerik ona ba hamlaha tanba durante situasaun empase politika sira hetan rendimentu oituan hodi sustenta moris, maibe bainhira estado aplika estado emergensia ba COVID-19, ema balun lakon rendimentu.
“Foin dadaun hau husu ajuda ba hau nia parseiru Timoroan ida, ne’ebe hela mos iha suku ida ne’e ajuda nesesidade baziku hanesan foos saka 30, supermi dos 30 no mina masa ki’ik 30 mai hau fahe ba ema 30 tanba sira ne’e labele liu,” nia hateten.
Iha parte seluk, reprejentante agensia World Food Program (WFP) iha Timor-Leste, Dageng Liu hateten situasaun lockdown fo impaktu bo’ot tebes ba ekonomia rai laran no ekonomia ema nian.
“Ohin ami simu ona informasaun final husi Ministerio Negosio Estrangeiru no Koperasaun, fo lisensa ba WFP atu halo operasaun humanitaria, liu-liu voo Dili, ba armajen regional Kuala Lumpur Malaysia. Ho ida ne’e ita bele kontaktu ho armajen global iha Dubai, Europa. Hau espera tempu badak ami sei hahu servisu aviasaun nian,” nia hateten.
