Adidu Trabalho Timor-Leste iha Australia, Antonio Armindo hatete katak kondisaun Trabalhador Timoroan sira iha nasaun Australia diak hela tanba ne’e husu ba familia sira keta paniku.
Nia hateten katak oras ne’e mais ou menus trabalhador Timoroan iha Australia hamutuk nain 1,130 ba programa sazonal, no nain 71 ba programa PLS nian.
“Hau nia mensagen ba familia sira iha Timor ne’ebé mak ninia oan, alin, subrinho, fen, laen ba servisu iha australia la bele paniku tanba sira iha situasaun ne’ebé mak diak hela,” dehan Adidu Armindo.
Nia haktuir katak kuandu iha buat ruma sira sei komunika ba sira nia empreja, no empreja sei komunika ba ekipa ne’ebé mak SEFOPE estabelese ona iha Darwin ka kontaktu ita nia embaixada ho konsoladu sira.
“Ne’ebé ita nia traballador sira ita kontrola lor-loron. Kontaktu lor-loron sira hotu-hotu kondisaun diak. Paniku ne’e normal tanba situasaun COVID-19 ida ne’e halo ema hotu paniku iha mundu tomak mais atu hatete deit katak kontinua kalma tenki fo apoiu nafatin ba sira”, nia informa.
Nia mos subliña katak familia la bele paniku liu, tenki mantein kontaktu ho sira. Husu sira fo apoiu ba sira, obriga sira tenki fase liman, tenki isola aan, tenki haris lor-loron, rona orientasaun husi emprejariu sira no rona orientasaun husi autoridade governu Australia nian.
“Hau hanoin sira diak hela. Paniku ba maibe kontinua fo apoiu ba, fo hanoin sira bebeik ajuda koragen sira para kontinua servisu iha Australia,” tenik nia.
Tuir Diretor Geral-SEFOPE, Paulo Alves haktuir katak trabalhador sira oras ne’e sei servisu iha Australia tuir dadus ne’ebé SEFOPE registu hamutuk 1,130 ne’e ba programa sazonal ba fulan neen, no 71 ba programa PLS nia durasaun tinan ida ka tinan tolu.
“Ami husu ba trabalhador sira iha Australia ho Korea la bele paniku e nomós ba familia sira iha Timor-Leste situasaun ruma ne’ebé sira infrenta bele mai konsulta no komunika ho ami para ita bele mantein komunikasaun ba ita nia ekipa ne’eba,” hatete Diretor Geral Alves.
Nia informa katak mantein nafatin komunikasaun ba trabalhador sira liuhusi via telefone, messenger, Facebook, WhatsApp, atu nune’e fo laran metin ba sira.
“Ami mos menssagem ba sira katak se la importante, la necessariu, hela iha uma nafatin. Hau fiar katak emprejariu sira ne’ebé fo kontratu imi, sei tau matan ba imi,” hatete Diretor Alves.
Nia hatutan katak, tanba iha kontratu ne’ebé governu Timor-leste ho Australia assina no kontratu ne’e inklui mos asegura Timoroan sira ne’ebé ba servisu iha Australia tuir akordu bilateral nasaun rua nian.
“Ita nia traballador sira agora hetan hela alojamentu, hetan asesu ba asistensia mediku Australia nian ho kualidade as. Sira seguru no maioria kontinua servisu hanesan bai-bain”, dehan Director Alves.
