Ministerio Edukasaun Joventude no Desporto (MEJD) Implementa ona kurikulum Edukasaun Saude Sexual ba iha eskola ensino baziku to’o sekundario, nune’e estudante sira bele iha koinhesimento konaba sira nia an lolos.
Ministra MEJD, Dulce de Jesusu Soares hateten edukasaun saude sexual ne’e implementa ona no dadaun ne’e la’o ona iha eskola sira iha Timor-Leste.
“Ita hakarak implementa edukasaun saude sexual sai hanesan materia ida hanorin ba estudante sira nune’e sira bele iha koinhesimento ba parte mudansa isin lolon, nune’e labele isin rua sedu no kaben sedu,” nia hateten iha Becora, Dili, foin lais.
Tanba ne’e nia haktuir tan MEJD serviso hamutuk ho parseiro sira hodi halo monitorizasaun ba implemntasaun edukasaun saude sexual ne’ebe mak oras ne’e la’o ona iha eskola sira iha terriotoriu laran.
“Implementasaun oras ne’e la’o diak hela, tuir buat ne’ebe mak hakerek iha kurikulum. Ministerio mos durante ne’e serviso ho ajensia sira hodi tau matan nafatin,” nia dehan.
Iha Parte seluk Sekretario Nasional Rede Edukasaun Timor-Leste Coalition for Education (TLCE) Jose Monterio hateten katak implementasaun ne’e la’o ona iha eskola sira, maibe ministerio tenke halo monitorizasaun nafatin nune’e bele hatene katak implementasaun ne’e prense duni nia objetivo ka la’e.
“Ita gasta osan bo’ot ba buat ne’ebe mak ita presija duni no bele rezolve duni nesesidade ne’ebe mak ita presija atu responde,” nia hateten iha knar fatin, iha Dili.
Maibe nia dehan, implementasaun edukasaun saude sexual iha eskolas ne’e diak nune’e estudante sira bele hatene sira nia an ho diak nune’e, sira bele atinje sira nia mehi ne’ebe mak iha.
“Ita hare iha estudante balun foin tama iha ensino baziku no sekundario deit sai hola mane ona tanba isin rua, tanba sira la iha koinhesimento ba sira nia an,” nia hateten.
Nia dehan, espera katak ho implementasaun ne’ebe mak ministerio serviso hamutuk ho parseiro sira ne’e, bele limita estudante sai sedu husi eskola, liu-liu estudante feto sira.
