Iha ambitu selebrasaun tinan 25 kareira medika, mediku nain hat senior iha Timr-Leste, dotor Rui Maria de Araújo, dotor Domingos da Silva, dotor Avelino Guterres Correia no dotor João Soares Martins apela ba mediku hotu-hotu atu kaer kodigu etika hanesan baze importante hodi orienta servisu lorloron nian, liu-liu servi komunidade sira ne’ebe moras.
Dotor Rui Maria de Araújo hateten kada profisaun ida-ida iha kodigu etika hanesan matadalan atu halao servisu hodi serviu povu.
Nia rekuinese sei iha lamentasaun husi publiku kona ba kualidade atendimentu mediku sira nian, maibe importante ba mediku sira atu servisu tuir kodigu etika ne’ebe profisaun ida ne’e iha.
“Ami sira iha medisina, ami iha juramentu hiprokratiku ne’ebe ami halo bainhira ami hahu ami nia profisaun, no ohin 16 de julho 2019, ami kompleta 25 anos, tanba ne’e ami hamutuk iha ne’e atu partilla esperensia ba joven sira ne’ebe prepara an hela, no apela profesional saude hotu-hotu katak ita presiza konsiente ita nia profisaun ne’e iha kodigu etika ne’ebe sai hanesan baze importante ba ita hotu bainhira halao ita nia knar lorloron nian,” nia hateten durante seminario tinan 25 iha kareira medika ho tema “Serbi Ema Moras, Povu no Nasaun” iha salaun CNE, Dili, foin lais.
Iha oportunidade ne’e orador sira konkorda sai mediku jeral tenke kontinua ba espesialidade, maibe area saude publika mos importante ba iha nasaun no povu tanba ne’e sira deside halao mos knar iha politika, asesoria, jestaun no profesores iha universidade sira atu forma rekursu humanu ne’ebe kualifikadu.
Entertantu, Pro-Reitor Asuntu Kooperasaun husi Universidade Nasional Timor Lorosa’e (UNTL), Eduardo Aniceto Serrao espera estudante sira Fakuldade Medisina no Siensia Saude bele rona esperiensia murak sira no tau iha neon no banati tuir tanba sai mediku iha situasaun difisil ne’e laos fasil.
“Ami bolu sira mai partilla esperensia no kuinesementu ba estudante sira hanesan motivasaun ida ba joven sira atu estuda iha siensia medisina tanba knar ida ne’e importante tebes hodi kuidadu ema ne’ebe saude diak labele monu ba moras, no ema ne’ebe moras ona,” nia hateten.
Iha parte seluk, Vice Ministru Saude no Ministru Saude Interino, Bonifacio Maucoli dos Reis kongratula mediku nain hat ne’ebe fo dedikasaun tomak hodi servi komunidade, povu no nasaun, liu-liu iha setor saude.
“Governu buka nafatin hakuak mediku sira ne’e hodi fo motivasaun ba mediku sira hotu servi komunidade diak liu ho kualidade atendimentu saude ne’ebe diak iha futuru,” nia hateten.
Nia dehan mediku nain hat ne’e fo dedikasaun tomak hodi harii no dezenvolve sistema saude iha Timor-Leste tanba sira laos deit servi pasiente, maibe sai mos hanesan politiku, asesor no profesores iha universidade sira.
