Parlamentu Nasional asina ona akordu koperasaun ho ospital Manipal, Malaysia, hodi fornese atendimentu tratamentu saude ba deputadu/a inklui funsionario sira tanba ospital nasional seidauk iha kapasidade atu fo tratamentu.
Sekretario Jeral Parlamentu Nasional, Adelino Afonso de Jesus hateten tinan hira liu ba kotuk parlamentu iha akordu ho ospital rua : hanesan ospital Singapur no ospital Siloam- Indonesia, maibe tinan 2019 ne’e halo fali koperasaun ho ospital Manipal Malaysia no Siloam Indonesia.
Nia dehan, akordu ida ne’e sira hala’o tanba iha kazu (moras) balun ne’ebe ospital no klinika sira iha rai laran seidauk iha kapasidade atu fo atendimentu.
“Akordu koperasaun ida ne’e atu fo atendimentu tratamentu saude ba deputados no funsionarios ne’ebe ho kazu klinika no ospital sira iha Timor –Leste laiha posibilidade atu fo atendimentu, bele haruka ba sira,” nia hateten hafoin asina MoU ho diretur Manipal hospital iha sala konferensia Parlamentu Nasional.
Nia dehan, akordu koperasaun ne’e hala’o ho durasaun tinan ida, maibe kada tinan halo revizaun ba akordu ida ne’e.
Iha parte seluk, Managing Director Manipal Hospital, Gaurav Rekhi sente orgulho tanba parlamentu hili Manipal Grupo no koperasaun ida ne’e inisio koperasaun entre ospital Manipal no Timor-Leste.
Nia dehan, ho akordu ida ne’e, hospital Manipal sei halo esforsu tomak atu fo tratamentu saude ne’ebe diak no kualidade ba pasiente sira husi Timor -Leste ne’ebe presiza no ajuda nasaun atu atinji moris diak povu nian.
“Ami tenke haree oinsa atu haforsa nasaun ho fasilidade sira ne’ebe maka iha, kapasidade atu fo tratamentu ba moras hotu, nune’e ita la presiza atu haruka ita nia ema ba halo tratamentu iha rai liur, ami sei servisu hamutuk ho nasaun ida ne’e atu bele ajuda malu hodi atinji nivel saude ne’ebe a’as,” nia hateten.
Nia dehan, akordu ida ne’e ho membru parlamentu, maibe iha tempu badak sei servisu hamutuk ho ministerio saude hodi ajuda ema barak liu tan no povu Timor –Leste.
