Konselho Imprensa (KI) kontinua sosializa Lei Komunikasaun Sosial inklui regulamento sira ne’ebe KI hasai ona ba instituisaun relevantes hanesan Polisia Nasional Timor-Leste (PNTL) no mos ba Falintil Forsa Defesa Timor Leste (F-FDTL) hodi sira mos iha konesementu.
Prezidente Conselho Imprensa Virgilio Guterres hateten, objetivo husi sosializasaun ne’e atu informa ba instituisaun sira ne’e, kona ba papel jornalista nian no komunikasaun nian.
Pelu menus, nia dehan sira bele intende jornalista sira nia serviso ne’e hakarak asesu ba fatin hotu, tanba sira mak sempre hasoru malu iha tereno, atu nune’e labele mosu dezintendimento ruma.
“Presiza iha koperasaun ida hanesan ne’e, bele fo hanoin ba malu, atu nune’e ita mos bele hatene, fatin ne’ebe mak ita bele asesu no labele asesu,” nia hateten, iha Dili.
“Atu dehan, katak bainhira ema nia liberdade hahu, hau nia liberdade mos remata, ida ne’e mak ita nia objetivo husi koperasaun ida ne’e,” nia dehan.
Hanesan jornalista, nia dehan dala ruma ho sira nia orgulho katak sira bele tama fatin hotu, husu buat hotu, hetan buat hotu no fo sai ba ema.
“Entaun ho koperasaun sira ne’e, ita bele hatene buat hotu katak ida ne’ebe mak ita bele fo sai no ida ne’ebe mak labele fo sai ba publiku,” nia dehan.
Entretanto Komandante Jeral F-FDTL, Major Jeneral Lere Anan Timor hateten nia parte servisu hamutuk ho KI hodi prepara diak liu tan sira nia ema, liu-liu sira ne’ebe mak iha area komunikasuan social.
Nia hateten, media social hanesan fator dezenvolvimento, tanba media okupa iha area barak, nia bele koalia politika, ekonomia, finansas no kona ba areas hotu ne’ebe faz parte iha vida humana nian.
“Ita ba-bain dehan katak ita nia jornalista sira, notisia ne’ebe fo sai tenke konstrutivu, labele destrutivo,” nia dehan.
Nia dehan, maibe dalaruma media social mos lori ida ne’e hodi halo bisnis, tanba kuando nia titlo notisia ne’e atrai, entaun ema hola barak, se la’e la hola.
“Maibe, ita orgulhu tanba ita nia jornalista sira ne’e mesak Timor oan hotu e la’os ema estranjeirus, sira hatene sira nia papel, sira nia dever no obrigasaun atu fo informasaun pozitivu ba povu iha rai doben ida ne’e,” nia hateten.
Nia husu, ba jornalista sira tenke lori ema ne’ebe la sivilizado ba sivilizado, la edukado tenke lori ba edukado liu husi sira nia reportajen, ida ne’e mak papel media nian.
Maibe nia dehan, la’os kompetensia ba jornalista sira atu halo buat hotu, iha areas balun bando ba sira atu tama li-liu koalia kona ba area military nian.
