Adjuntu Autoridade Munisipio Dili, Zeca Smith hateten kontribuisaun komunidade sira nian importante tebes atu rezolve problema lixu iha Dili laran.
Nia dehan, autoridade Dili kria mekanismu oi-oin hanesan hasai orario soe foer, tau kontentor lixu nian iha dalan publiku sira atu komunidade sira bele tau lixu, maibe komunidade nafatin la kumpri regras sira ne’e kontinua soe foer tuir sira nia hakarak.
“Ita bele iha jestaun furak, maibe kontribuisaun husi komunidade laiha, ita sei la rezolve problema lixu iha Dili laran,” nia hateten.
Nia rekonese, katak seidauk iha kondisaun ne’ebe nato’on intermus sistema kontrolu liu –liu CCTV no lei atu fo sansaun ba ema ne’ebe soe lixu arbiru, tanba ne’e konsiensia komunidade nian importante tebes hodi Dili bele sai kapital ne’ebe mos.
Nia informa, iha tinan 2017 governu aloka orsamentu $20 miloens atu kria kondisaun hodi rezolve problema lixu iha Dili laran ne’ebe iha hela prosesu estudu ba espasu iha Dili laran atu halo instalasaun ba kontentor.
Nia dehan, planu ida ne’e sei realiza iha fulan Agostu tinan 2018, liu –liu sei instala kontentor lixu nian ho distansia metro 100 husi komunidade sira nia uma.
“Konsiensia komunidade ne’e importante tebes atu estabelese sistema ou instala sasan sira ne’e iha fatin publiku, seguru no ema hotu tenke kuidadu,” nia haktuir.
Nia informa, lei numeru 33/2009 kona ba saneamentu koalia deit kona ba bandu ema labele fa’an sasan iha estrada publiku no soe foer arbiru, maibe la defini klaru montante sansaun ne’ebe aplika ba ema sira ne’e, tanba ne’e lei ne’e seidauk implementa.
Iha parte seluk, Xefe Suku Kaikoli Hipolito Sarmento hateten sira halo sosializasaun bei-beik ba komunidade sira kona ba orario soe lixu nian no impaktu husi soe lixu arbiru iha baleta sira, maibe nafatin akontese.
“Ita komunidade mak laiha konsiensia dunik, tanba ita hare saneamentu raut foer kareta halai liu, komunidade mai soe fali ona foer,” nia hateten.
Entaun atu rezolve problema lixu, nia dehan governu foun mai tenke kria lei ida ne’ebe forte atu bele implementa liu –liu fo sansaun ba ema ne’ebe soe foer arbiru no la tuir orario, ho ida ne’e mak bele garantia sidade moos.
