Komunidade iha Dili laran, ho antuziasmu ba tuir votasaun hodi hili Prezidente da Republika ba periodu 2017-2022 ho kalma no hakmatek tanba hetan seguransa husi Polisia Nasional Timor-Leste (PNTL).
Xefe Suku Bairo-Pite, Joao Baptista hateten iha sentru votasaun suku Bairo-Pite komando koloka membru Polisia nain tolu hodi asegura seguransa iha fatin ne’eba.
“Seguransa rai laran la’o normal, seguru no komunidade sira vota ho hakmatek,” nia hateten, hafoin tuir votasuan iha sentru votasaun suku Bairo-Pite, Dili.
Alende ne’e, nia hateten husi Unidade Batallaun Orden Publiku (BOP) mos halo vigilansia hodi observa situasaun iha Dili laran durante elisaun la’o.
Nia informa, komunidade inklui autoridade local sira mos kolabora diak ho PNTL, hamutuk asegura seguransa rai laran atu elisaun ne’e bele la’o ho susesu.
Iha parte seluk Koordenador Programa no Audit Fundasaun Mahein Abel Amaral, apresia ba servisu PNTL, koloka nia membru sira sentru votasaun hotu iha rai laran, liu-liu iha Dili hodi asegura seguransa ba komunidades.
Mesmu elisaun jeral tinan ne’e (2017) PNTL mesak mak asegura seguransa rai laran, maibe nia apresia ba sira tanba konsege hatudu duni ba publiku katak PNTL bele.
“Polisia sira kolokadu iha fatin-fatin, sira halo patruliamentu rutina ne’ebe diak,” nia dehan.
Entretantu defisiente Sonya Correia Mendes, sente urgulho tanba bele tuir elisaun iha situasaun ne’ebe seguru no hakmatek.
“Hau kontente tanba hau tuir elisaun ho seguru,” nia kontente.
Tuir observasaun Jornalista TDW iha terenu, nota katak Komandante Jeral PNTL halo mos vigilansia rodaviaria iha bairu-bairu sira, liu-liu iha areas sira heleo no besik sentru votasaun sira.
