Durante tinan 2016, servisu imigrasaun konsege registu ema estrangeirus nain 949 mak viola vistu turista hodi hala’o servisu iha rai laran.
Husi numeru ne’e, nain 112 husi Indonezia, Cina nain 4, Vietnam nain 6, Cambodia nain 11 enkuantu nain lima husi Australia.
Komandante Sektor Operasional Servisu Migrasaun, Asistente Inspektor Vicente Gusmão, hateten bazea ba numeru ne’ebe iha, maioria sidadaun husi Indonezia mak viola vistu turista.
“Sira mai ho vistu turista, maibe to’o iha ne’e sira buka fali servisu hodi benefisia ba sira nia aan rasik,” Komandante Gusmao hateten, iha Dili.
Nia dehan, sira ne’e barak servisu iha area konstruksaun, hala’o servisu nudar negosiante ki’ik no loke warung.
Husi nain hira ne’e, nia informa iha nain 813 mak selu multa ona ba estadu, restu nain voluntariumente haruka sira fila ba sira nia rain.
Entaun nia husu ba ema estrangeiru sira atu labele viola tan regras hirak ne’ebe iha, sekuandu tama Timor ho intensaun servisu, tenke trata vistu trabalhu nian.
“Tenke iha sentidu hodi kumpri nasaun ida nia regras internal ne’ebe iha,” nia hateten.
Iha parte seluk Deputada Anna Ribeiro, apresia ho servisu migrasaun nian hodi halo operasaun kada fulan no loron hodi detekta violasaun ne’e.
“Sira nia servisu diak, maibe presiza hadiak liu tan iha operasaun,” nia dehan.
Tanba, tuir nia volume ema estrangeirus ne’ebe viola vistu turista hodi halo servisu iha rai laran kada tinan sa’e.
“Governu presiza hadia sistema, nune’e ema sente tauk no la viola regras ne’ebe ita iha,” nia sujere.
