Governu sei fo subsidio ba partidus politiku ne’ebe konkore iha elisaun jeral 2017, maibe depois de elisaun remata.
Desizaun ida ne’e bazea ba revizaun ba lei artigu 3/2004 ba artigu 2/2016 kona ba subsidio ba partidus politiku ne’ebe durante ne’e hetan uluk subsidio antes elisaun.
Razaun governu muda lei ne’e, tanba tuir Prezidente Komisaun Nasional Elisaun (CNE) Alcino Barris, katak iha partidu barak mak sei kompete iha elisaun jeral tinan ne’e.
“Agora ita muda no ita fo subsidio bazea ba votus ne’ebe sira hetan iha elisaun,” Barris hateten, iha Dili.
Kona ba hira-hira, nia dehan depende ba lei haruka.
Nia informa, iha elisaun jeral tinan 2012 partidu sira hetan subsidio, ba partidus ne’ebe avansa ho sira nia bandeira rasik hetan $20 mil, enkuantu avansa ho koaligasaun $30 mil.
Iha parte seluk Membru Parlamentu (MP) Paul Moniz, hateten muda lei ida ne’e hanesan parte ida atu eduka parpol sira atu labele dependensia finanseiru demais ba governu.
“Loke partidu barak-barak tenke iha fundus rasik,” nia hateten.
Nia esplika, iha lei ne’e hatuur klarumente katak, partidus politiku ba halo kampanha sein hetan osan husi estadu.
“Governu sei ganti rugi fali sira nia osan depois de elisaun, maibe sekuandu partidu la hetan votus, pasensia sira sei la hetan osan,” nia hateten.
Iha parte seluk komunidade Alvaro Fernandes, konkorda ho mudansa lei subsidio ba parpol ne’e, labele gasta orsamentu estadu nian ho arbiru.
“Governu fo tiha osan maibe to’o ikus sira la manan, entaun osan sira ne’e gasta saugate deit,” nia hateten.
