Fase liman antes han importante tebes ba ema ida-idak atu prevene aan husi moras infeksaun sira, maibe maioria komunidade Timor-Leste seidauk abitua halo ida ne’e.
Diretor Jeral Ospital Nasional, Jose Antonio hateten fase liman hanesan informasaun saude publiku baziku ida ne’ebe lolos labarik sira hetan husi inan aman sira, maibe dala barak ida ne’e laiha.
“Komunidade seidauk iha sensibilidade atu hatoman aan fase liman, tan ne’e ministerio saude tenke kontinua halo promosaun iha komunidades,” nia hateten iha selebrasaun loron mundial fase liman iha Ospital Nasional Guido Valadares (HNGV), Dili.
Tanba liu husi fase liman, nia hateten bele prevene ona moras infeksaun sira inklui diarea, infeksaun respiratorio, pulmaun no seluk tan, tanba moras hirak ne’e da’et ba ema husi microbios ne’ebe iha liman.
Alende ne’e, nia dehan molok atu prepara aihan, tenke fase liman ho moos.
“Iha Timor moras ida diarea ne’e mak oho ita nia labarik sira,” nia hateten.
Hanesan mediku, nia emfazia (menekankan) ba komunidade sira atu labele ignora atitude ida ne’e, tenke hatoman aan fase liman.
Entretantu Manager Kompania Lisun, Rut Hutomo Kontente ho apoiu governu Timor –Leste halo kampanha nasional kona ba fase liman hodi hasa’e konesementu komunidade nian kona ba importansia fase lima ba saude.
“Fase liman ne’e fasil, maibe nia efeitu bo’ot tebes ba ema nia moris, entaun hahu agora fase liman ho bee no sabaun,” nia hateten.
Nia dehan, fase liman ne’ebe diak mak fase liman iha bee ne’ebe sulin iha tornera no uza sabaun, labele hoban liu deit iha basia laran.
Iha tinan 2016 ne’e, nia dehan kompania prepara sabaun hamutuk 1000 atu distribui ba iha eskola no ba fasilidade saude balun hodi eduka estudantes atu fase liman ne’ebe loos.
Enkuantu tuir komunidade Rosaria Martins, katakk komunidade la’os ignora atitude ida ne’e, so ke bee mak laiha duni ba komunidades atu pratika moris saudavel.
“Ita ba hanorin kona ba higieniku inklui fase liman, komunidade hateten ba ita “bee ba ami atu hemu mos laiha, haruka tan ami fase liman”,” nia hateten.
Tanba ne’e, nia dehan presiza konsidera mos situasaun sira ne’e liu –liu halo investimentu ba bee moos atu asegura komunidades asesu ba bee moos.
