Inan aman sira iha obrigasaun atu fo hanoin oan sira labele konsumu hahan kma’an (makanan ringan) sira ne’ebe faan iha estrada ninin tanba hahan sira ne’e la seguru no bele causa ba moras.
Diretora Organizasaun Hamutuk Ita Ajuda Malu (HIAM Health), Rosaria Martins da Cruz hateten hahan sira ne’e perigu ba ema liu –liu labarik sira ne’ebe konsumu, tanba hahan sira ne’e laiha protesaun.
“Laiha buat ida mak atu proteze hahan ne’e husi rai rahun no lalar, entaun bainhira ita sosa han, ita bele hetan moras diarea no perigu liu ba labarik sira,” nia hateten, iha Dili.
Alende ne’e, nia mos preokupa ho inan sira ne’ebe fa’an hahan sin sira (has budu no seluk tan) iha kompleksu eskola tanba hahan sira ne’e bele fo moras ba labarik sira.
Iha parte seluk komunidade Andre da Silva, hateten negosiante sira ne’e buka moris liu husi atividade negosio ki’ik sira hanesan fa’an iha estrada ninin, eskola oin no seluk tan.
“Governu tenke iha regulamentu ida atu bandu ema labele fa’an iha estrada ninin, eskola no igreja oin, hakarak fa’an ba fa’an deit iha merkadu,” nia hateten.
Nia hatutan, inan aman sira tenke proteje oan sira liu husi fo informasaun ba oan sira kona ba aihan ne’ebe seguru, tanba negosiante sira ne’ebe fa’an la sala sira mos buka osan.
