Aihan diak no saudavel mak aimoruk ne’ebe efetivu liu hodi proteje ema husi moras hotu ne’ebe afeta ema nia isin.
Premiadu Prof. Richard Roberts, hateten tanba ne’e importante tebes atu konsumu aihan ne’ebe iha valor kaloria, mikronutriente no vitamina aas.
“Ho kondisaun malnutrisaun, insufsiente aihan, difisil tebes ba o nia isin atu luta kontra moras sira ne’ebe iha,” nia hateten iha Hotel Timor, Dili.
Nia hateten, ema ne’ebe halo dieta diak sei hetan isin diak no forsa hodi kontra moras inklui mos moras infesaun kronika sira.
Entretantu Vise Ministra Saude, Ana Isabel Soares konkorda katak hahan sai fator importante hodi kontribui ba iha hadia saude iha ema ida-idak.
“Modo, aifuan ne’ebe ita kuda iha ita nia uma sorin. To’os ne’e valor nutrisaun bo’ot tebes hodi kontribui ba iha hadia saude,” nia hateten.
Nia dehan, ministerio servisu hamutuk ho agensia sira Programa Mundial Aihan (WFP) no Organizasaun Mundial Saude (WHO) fo edukasaun ba komunidade sira kona ba importansia dieta saudavel no valor nutrisaun husi aihan local sira.
Nia hateten, ideias diak ne’ebe Timor–Leste liu –liu Ministerio Agrikultura e Peskas (MAP) presiza haree mak halo programa hakaben aihoris (perkawinan silang tanaman) atu bele iha produsaun ne’ebe barak no kualidade.
