Desde okupasaun Indonezia to’o ohin loron Timor ukun aan komunidade iha suku Raiheu, postu administrativu Kailako, munisipiu Bobonaro seidauk asesu ba eletrisidade.
Membru Parlamentu Jacinta Abu Cau Pereira, hateten situsaun ida ne’e impede labarik sira atu estuda iha tempu kalan.
“Komunidade sira uja deit lampu petromax bainhira kalan e desde uluk kedas,” nia kestiona iha Parlamentu Nasional.
Kestaun estrada, ahi inklui bee moos, nia dehan ne’e nudar direitu baziku povu nian atu asesu e governu iha obrigasaun no dever atu oferese ba sira.
“Governu hanesan orgaun ezekutador presiza haree povu nia direitu baziku hirak ne’e,” nia husu.
Nia rekonese, katak munisipiu balun 100% komunidade ne’ebe hela iha sukus no aldeias asesu hotu ona ba eletrisidade, maibe balun mos seidauk inklui suku Raiheu.
“Governu tenke esforsu hodi hotu-hotu bele asesu,” nia sujere.
Alende eletrisidade, nia hateten komunidade suku Raiheu mos ladauk asesu ba estrada ne’ebe diak.
Hatan ba kestaun ne’e I ViseI Ministru Obras Publiku, Januario da Costa Pereira, rekonese katak suku balun seidauk, maibe governu esforsu hodi iha tinan 2030 komunidade hotu-hotu bele asesu ona ba ahi.
“Ita nia planu ne’e iha 2030, hotu-hotu tenke asesu ona ba ahi, e sira ne’ebe seidauk asesu, neneik-neneik sei asesu hotu ba ahi,” nia hateten.
