Primeira vez governu Timor-Leste fo oportunidade ba Timoroan ne’ebe hela iha rai liur (estrangeirus) atu tuir votasaun iha elisaun jeral ne’ebe sei hala’o iha tinan 2017.
Tuir lei Nu 6/2016 kona ba resensiamentu, fo biban ba Sekretariadu Tekniku Administrasaun Eleitoral (STAE) atu halo registu ba Timoroan sira ne’ebe hela iha estrangeirus hodi bele tuir eleisaun jeral tinan oin (2017).
Diretora Interina STAE, Tulia Onorina hateten STAE preparadu intermus sistema ho resensiamentu hahu iha fulan Setembru tantu iha estrangeirus no rai laran.
“Lista ne’ebe mai husi ministerio negosio estrangeirus iha nasaun hat Australia, Englatera, Korea no Indonesia, maibe Indonesia sei iha kestaun politiku ne’ebe aas, entaun ami registu uluk iha nasaun tolu seluk,” Onorina hateten hafoin partisipa iha briefing ho embaixadores iha Kampaun UNDP, Dili.
Nia dehan, Indonesia seidauk klaru tanba sira la aseita ho dupla sidadania maske Timoroan barak mak hela iha Indonesia durante okupasaun Indonesia (1975-199) ne’ebe agora sidadaun Indonesia.
Entretantu Ministru Negosio Estrangeirus e Kooperasaun, Hernani Coelho hateten Timor nia embaixada halo ona registu ba estudantes, trabalhadores ne’ebe hala’o servisu iha nasaun ne’ebe sira iha ba.
Iha faze tolu mak presiza halo mak, nia dehan registu konsular, resensiamentu eleitoral no votasaun.
Nia dehan, resensiamentu ne’e obrigasaun governu nia atu hala’o, maibe votasaun ne’e livre, la obriga sidadaun atu vota.
“Ita la tau sentru votasaun ida ba Timor oan nain 10 deit, ne’e imposivel tanba kustu bo’ot,” nia hateten.
Nia informa, volume Timor oan barak iha nasaun Australia, Portugal, Englatera, Korea no Indonesia tanba sira halo servisu no estuda iha nasaun sira ne’e.
