Iha espesialista nain 12 husi Universidade Udayana (Bali), Indonesia mak dadaun ne’e hala’o hela operasaun ba pasientes matan, ibun sakat inklui konsulta gratuita iha Ospital Nasional Guido Valadares (HNGV).
Prezidente Asosiasaun dos Antigos Estudantes Universidade Udayana, Brigida Correia hateten atividades ne’e hanesan parte ida hodi komemora Dies Natalies Universidade Udayana nian ba dala 54.
Razaun hili Timor –Leste atu selebra loron dies natalies universidade Udayana nian ba dala 54 nian, nia dehan tanba Timor iha asosiasaun antigos estudantes universidade nian estabelesidu e fasil atu organiza atividade hotu.
“Orgulho alumni Udayana barak mak agora tuur iha pozisaun aas iha Timor –Leste inklui atual primeiru ministru, tanba ne’e sira hili Timor hodi komemora dies natalies universidade nian,” nia hateten iha Dili.
Atividade operasaun loron ida ne’e konsentra deit iha HNGV, nia hateten tanba tempu limitado no presiza ekipamentus adekuadu atu halo tratamentu.
Alende ne’e, nia dehan iha mos atividade sosial seluk hanesan loke feira tradisional, halo asaun sosial ba familia kbi’it la’ek iha munisipio Liquisa inklui vizita eskola balun iha area rural.
Iha parte seluk responsavel Sentru Nasional Matan (SNM), Belmerio Jeronimo hateten espesialista hirak ne’e la’os foun, maibe tuan tanba sira mak fo atendementu ba pasientes matan ne’ebe halo referral ba ospital iha Bali durante ne’e.
“La’os tanba ita nia mediku labele halo operasaun, maibe tanba sira mai halo atividade iha ne’e, entaun ita fo konfiansa ba sira atu halo operasaun ba pasientes,” nia hateten.
Nia hateten, espesialista sira ne’e halo operasaun ba pasiente matan nain neen ne’ebe sentru matan prepara ona.
Nia hateten, pasiente sira ne’e sofre moras katarak tanba maioria pasiente ho idade avansadu ona (50 ba leten).
