Mane ida (arguido) ho konsiensia involve iha aktu krimi explorasaun seksual terseisu (fa’an feto), ho aktu ne’e tribunal kondena arguido tinan hitu (7) iha prizaun.
Tuir akuzasaun ministeriu publiku ne’ebe lee sai husi juis prezidente, katak iha tinan 2014 maizu menus tuku 2:30 lokraik, arguido lori lezada (20 anos) ba hotel Macau, wainhira to’o iha ne’eba arguido tuun hodi halo negosiasaun ho kliente, wainhira arguido sei koalia namanas hela ho kliente ne’e, derepenti polisia mai hodi kaptura kedas arguido no lezada inklui kliente ne’e.
Arguido fa’an lezada ba dala tolu ona hodi hetan lukru ba nia aan rasik, iha inisiu arguido hatene katak lezada hala’o vida prostituta, ho ida ne’e arguido uza oportunidade ne’e hodi fa’an lezada.
Arguido (34 anos) nudar kaben nain no aman ba oan nain rua, servisu nudar taxista e hela iha Becora.
Hafoin lee sai akuzasaun hirak ne’e, juis husu ba arguido atu hili koalia ou nonok, maibe iha altura ne’eba arguido hili nonok, hodi prova katak akuzasaun ne’e los hotu.
Iha fatin hanesan Ministeriu Publiku kondena arguido ho kastigu ne’ebe todan hodi fo edukasaun ba arguido, tanba aktu ne’ebe mak arguido komete ne’e nudar krimi ida.
Entretantu parte defeza husu ba tribunal atu fo pena ne’ebe natoon tanba arguido rekonese aktu ne’ebe mak nia halo.
Iha oportunidade ne’e juis prezidente, hateten aktu ne’ebe mak arguido komete ne’e inmoralidade no halo moe estadu.
“Aktu ne’e ladiak, espera iha prizaun ita bele arepende no labele halo tan aktu ne’e,” nia husu.
Enkuantu juis prezidente fo pena prizaun tinan 7 ba arguido, no kazu ne’e rasik julga iha Tribunal Munisipal Dili.
