Agensia internasional Estadu Unidus da Amerika (USAID) liu husi programa Avansa Agrikulture fo ona treinamentu ba feto nain 25 (husi grupus Habata, Mata, Aiasa no Aiheken husi postu administrativu Atabae, munisipiu Bobonaro) kona ba agrikultura komercial.
Espesialista Jeneru no Joventude ba projetu Avansa Agrikulture, Sebastiana da Costa Pereira, hateten treinamentu ne’e importante tanba bele enkoraja feto maluk sira ne’e, hodi muda sira nia mentalidade husi argrikultura sustentavel ba komercial.
“Tenke hatene saida mak targetu, saida mak produtu no oinsa prosesu ba fa’an nian, oinsa haburas rai no kuidadu modo,” nia hateten.
Tuir nia, iha feto agrikultura barak mak seidauk hatene kona ba oinsa utuliza argikultura sai hanesan parte importante ida hodi hadia ekonomia uma laran.
Maluk feto hirak ne’e, nia dehan oras ne’e dadaun kuda hela modo oin-oin hodi fa’an ba merkadu ne’ebe USAID fasilita hanesan iha supermerkadu Kmanek no seluk-seluk.
“Modo aifuan melon, fore talin e kada grupus semana-semana sempre hetan lukru,” nia hateten.
Alende oferese formasaun iha ares oin-oin, dala ruma mos liu husi programa ne’e ekipa tekniku sira fo hanoin ba maluk feto sira ne’e, hodi utiliza redementu ne’ebe sira hetan, hodi investe fali ba negosiu seluk.
Iha parte seluk Xefe Grupu Mata, Eulalia da Cruz , kontente tanba bele hetan formasun ida ne’e, hodi kapasita tutan maluk feto sira hodi utiliza setor agrikultura hadia roda ekonomia uma laran.
“Treinamentu ne’e diak tebes, oinsa mak ami bele kuda aihan ho diak hodi kompete iha merkadu, aumenta rendementu ekonomia uma laran,” nia hateten.
