Membru Parlamentu Nasional, Deputada Angelina da Costa, husu ba Ministerio Interior atu estabelese kazerna ba membru Polisia Eskuadra postu administrativu Atauro nian.
Tuir nia, presiza duni estabelese kazerna iha ne’eba, atu nune’e membru polisia sira bele hela inklui lori ho sira nia familia.
“Sira mai servisu iha vila husik hela sira nia familia iha foho, ne’e ladun diak, talves halo sira hanoin barak no hala’o servisu ladun ho masimu,” nia preokupa, iha Parlamentu Nasional.
Iha nasaun ne’ebe deit, nia dehan polisia sira presiza iha kazerna ne’ebe adekuadu ba sira, tanba dala barak komunidade no lideransa balun sempre kestiona kona ba servisu polisia nian, maibe la kria kondisaun ne’ebe efetivu.
Nia dehan, kestaun ne’e komandante eskuadra Atauro hato’o dala barak ona mai iha komando jeral, maibe to’o agora laiha rezultadu.
“Sira preokupa tanba sira presiza, ida ne’e ita presiza tau konsiderasaun,”nia hateten.
Iha fatin seluk Segundu Komandante Jeral Polisia Nasional Timor Leste (PNTL), Komisariu Faustino da Costa, hateten komando iha duni hanoin atu kria kondisaun ne’ebe sustentavel ba membru sira, maibe orsamentu mak la sufsiente.
“Ami tinan-tinan hakarak atu halo ida ne’e, hadia ida ne’eba, maibe ami tenke haree ba envelope fiscal ne’ebe determina,” nia hateten.
Mesmu iha difikuldade oi-oin mak membrus PNTL hasoru iha terenu, maibe nia dehan, nafatin alkansa hodi garantia seguransa iha rai laran.
