Oras ne’e dadaun aimoruk items 30 mak stock out iha Armagen Sentru Saude (ASS) munisipio Dili, tanba stock aimoruk iha armagen Servisu Autonom Medikamentus e Ekipamentus Saude (SAMES) mos laiha.
Delegada Saude munisipio Dili, Agustinha da Costa Saldanha, rekonese kestaun ne’e maibe ida ne’e la fo impaktu ba iha atendementu saude ba komunidades.
“Aimoruk kuaze 30 items mak stock out, maibe la fo impaktu bo’ot ba asistensia, tanba sei iha aimoruk alternative seluk,” nia hateten, iha Dili.
Nia dehan, aimoruk sira ne’e la’os aimoruk ne’ebe ho tipu esensial hanesan aimoruk antasida no antibiotika balun ne’ebe bele uza fali aimoruk seluk hodi fo atendementu.
Nia hateten, saude munisipiu iha mos orsamentu oituan ne’ebe aloka hodi kompras emergensia ba medikamentus ruma bainhira iha SAMES laiha, nune’e bele asegura asistensia saude nafatin la’o.
Kona ba atendementu saude primaria, nia dehan laiha problema tanba aimoruk hanesan paracetamol ne’e iha hodi fo atendementu ba moras baibain sira.
Iha parte seluk Membru Komisaun F (saude, edukasaun, kultura, veteranus e igualidade jeneru), Deputada Ilda Maria da Conçeicão lamentavel tanba kada tinan Parlamentu Nasional aloka orsamentu bo’ot ba sosa aimoruk.
“Hau lahatene problema ne’e iha ne’ebe?, tinan-tinan ita aloka orsamentu bo’ot ba sosa aimoruk, maibe fasilidades saude inklui ospital nasional, sentru saude to’o postu saude sira kuaze falta aimoruk,” nia preokupa.
Tanba ne’e, nia rekomenda ba Ministerio Saude (MS) atu halo revizaun ba kontratu ho kompania sira ne’ebe durante ne’e sosa aimoruk tanba aimoruk barak mak sosa ho data prazu badak.
“Labele sosa fali aimoruk ne’ebe data expire badak,tanba se la’e aimoruk sira ne’e estraga hotu,” nia rekomenda.
Entretantu Deputadu Jacinto Viegas Vicente, hateten Ospital Referal Maliana mos stock aimoruk menus.
“Kuandu pasiente sira ba halo tratamentu doutor sira fo deit receita ba sosa iha liur, ne’e akontese duni no hau rasik asiste,” nia kestiona.
