Asosiasaun Feto munisipio Manatuto (AFM) halibur kontribuisaun husi feto emprezaria no funsionario sira hodi ajuda fali familia no feto vulneravel sira iha area rural iha munisipiu Manatuto.
Prezidente AFM, Clara de Carvalho Ximenes, hateten programa asistensia social ne’e ho objetivu hodi dere feto emprezaria sira nia fuan atu ajuda feto maluk ne’ebe moris iha insufsiente laran.
Antes ne’e, nia dehan, membrus asosiasaun sira ba visita sai-tama sukus hodi haree kondisaun feto no familia sira e barak mak presiza tebes tulun.
Tanba ne’e, nia dehan, asosiasaun hola inisiativa halo advokasia ba feto emprezaria no funsionario sira ne’ebe iha kbi’it atu ajuda.
“Asosiasaun hamutuk ho feto emprezaria no funsionario halo programa visita ema kiak, faluk, feto abandonadu sira, haree sira nia kondisaun no entrega sasan balun ba sira,” nia hateten, iha salaun enkontru Tower Fatuhada, Dili.
Kontribuisaun ne’ebe iha, nia hateten, la’os osan maibe sasan nesesidade baziku no roupa ba labarik sira, tanba sira presiza sasan sira ne’e.
Nia hatutan,programa ida ne’e atu garantia mos ezistensia Asosiasaun feto nian atu labele mate.
“Entau ami provoka halo atividade asistensia social liu husi ajuda feto seluk,” nia dehan.
Iha tinan 2013, nia informa, governu liu husi Sekretaria Estado Promosaun Igualidade (agora SEM) estabelese estruturas asosiasaun feto iha 12 munisipios inklui Regiaun Autonomo Espesial Oe-Cusse hodi sai mahon ba feto sira iha area rural.
Iha parte seluk Prezidente Asosiasaun Feto munisipio Baucau, Regina de Sousa, hateten sira nia asosiasaun laiha kbi’it (finanseira) hodi ajuda feto maluk sira ne’ebe presiza.
“Dadaun ne’e ami dezenvolve hela mikro kreditu ki’ik hodi ajuda feto vulneravel sira halo buat ruma hodi sustenta sira nia moris,” nia hateten.
Kona ba orsamentu ba asosiasaun nian, nia dehan, iha tinan 2016 Sekretaria Estado Apoiu Sosio Ekonomia Feto (SEM) aloka osan ba asosaiasaun sira hodi hola material eskritorio, maibe tanba sira laiha eskritorio permanente, entaun sira deside dezenvolve fali programa kreditu ba feto sira.
